बेलायतकी नयाँ प्रधानमन्त्री ट्रस र उनका पति गुगल खोजीमा अग्रपंक्तिमा (फोटोहरु)

विश्वजगत्

गृहपृष्ठ
विश्वजगत्

बेलायतकी नयाँ प्रधानमन्त्री ट्रस र उनका पति गुगल खोजीमा अग्रपंक्तिमा (फोटोहरु)

एजेन्सी बुधबार, भदौ २२, २०७९

बेलायतमा तेस्रो महिला प्रधानमन्त्री लिज ट्रस नियुक्त भएपछि विश्वभरी उनीप्रति चासो बढेको छ । महारानी एलिजाबेथ द्वितीयाले स्कटल्यान्डस्थित बाल्मोरल कासलमा ट्रसलाई औपचारिक रूपमा पदबहाली गराएपछि उनीप्रति चासो बढेको हो । ४७ वर्षीया प्रधानमन्त्री ट्रसका पति ह्यू ओलिरी पनि गुगलमा खोजिने प्रमुख व्यक्ति बनेका छन् । प्रधानमन्त्री ट्रसका पति ४८ वर्षका छन् । ओलिरी पेशागत रुपमा एकाउण्टेण्ट हुन् । उनी हाल रियल स्टेट कम्पनीको वित्त निर्देशक छन् ।

बेलायतमा यसअघि दुई महिला मार्गरेट थ्याचर र टेरिजा मे बेलायतको प्रधानमन्त्री बनेका थिए । सोमबार मात्र ट्रस सत्तारुढ कन्जर्भेटिभको नेतृमा चयन भएकी थिइन् । देशको कमजोर अर्थतन्त्रको चुनौती सामना गर्नु नयाँ प्रधानमन्त्रीका लागि मुख्य चुनौती हुनेछ । किनकि चार दशकपछि बेलायतको मुद्रास्फीति सबैभन्दा उच्च छ ।

विवादबीच जुलाई महिनामा मन्त्रिपरिषद्का सदस्यहरुले एकपछि अर्को राजीनामा दिएपछि बोरिस जोनसनले पद त्याग्न बाध्य भएका थिए । जोनसनले पदत्याग गर्ने घोषणा गरेपछि नयाँ नेतृत्व छनोट गर्न सात साता लामो प्रक्रिया चलेको थियो ।

नयाँ नेतृत्वका लागि सुरुमा ११ जनाले प्रतिस्पर्धा गरेका थिए । कन्जर्भेटिभ पार्टीका सांसदहरूले गरेको मतदानबाट प्रतिस्पर्धाको अन्तिम चरणमा ट्रस र सुनक छानिएका थिए । उनीहरूमध्ये एक जनालाई छान्न टोरी पार्टीका १ लाख ६० हजारले मतदान गरेका थिए । अधिकांश सांसदहरूको समर्थन सुनकलाई भए पनि पार्टीका सदस्यहरूले ट्रसलाई बढी रुचाएको विभिन्न मतसर्वेक्षणहरूले देखाएका थिए ।

विभिन्न मन्त्रालयको पद सम्हालेकी ट्रस एक वर्षअघि विदेशमन्त्री बनेकी थिइन् । उनले आफ्नो राजनीतिक यात्रा दक्षिणपन्थी कन्जरभेटिभमा लाग्नुअघि मध्यमार्गी लिबरल डेमोक्र्याटको सदस्य बनेकी थिइन् । सन् २०१६ मा उनले बेलायत युरोपियन युनियनमा रहनको लागि अभियान चलाइन् तर बेलायतीहरूले ब्रेजिक्टलाई समर्थन गरेपछि कित्ता परिवर्तन गरिन् ।

सन् २०१० मा संसदमा मात्र निर्वाचित भएकी ट्रस अपेक्षाकृत छोटो अवधिमा आफूलाई एक राजनीतिक शक्तिको रूपमा स्थापित गरिन् । उनले आफ्नो एजेन्डालाई अथक जोस र स्पष्ट उत्साहका साथ अगाडि बढाएकी छन् ।

प्रकाशित मिति: बुधबार, भदौ २२, २०७९

प्रतिक्रिया दिनुहोस्