नेपालमा आयातित फलफूल तथा तरकारीमा विषादीको प्रयोग

स्वास्थ्य

गृहपृष्ठ
स्वास्थ्य

नेपालमा आयातित फलफूल तथा तरकारीमा विषादीको प्रयोग जुनार, केरा, चुकन्दर तथा आलू लगाएतका ५१ वटा नमूनामा खान अयोग्य विषादी भेटियो

समाचारदाता मंगलबार, साउन १७, २०७९

नेपालमा आयातित तरकारी तथा फलफूलमा जीवनाशक विषादीको प्रयोग हुने गरेको पाइएको छ ।

खाद्य प्रविधि तथा गुण नियन्त्रण विभागले मंगलबार काठमाडौंमा पत्रकार सम्मेलन गर्दै कार्तिक १ गतेदेखि असार मसान्तसम्म ५६ हजार ३ सय ३८ वटा आयातित फलफूल तथा तरकारीका नमूनाहरुको परिक्षण गर्दा जुनार, केरा, चुकन्दर तथा आलू लगाएतका ५१ वटा नमूनामा खान अयोग्य हुने जीवनाशक विषादीको प्रयोग हुने गरेको पाइएको जनाएको हो ।

कृषि मन्त्रालयको निर्देशनमा कार्तिक १ गतेबाटै बिभागका ७ वटा कार्यालयले द्रुत गतिमा परिक्षणको काम थालेको समेत बिभागले जनाएको छ ।

आर्थिक बर्ष २०७८÷७९ मा भएका कामहरुको बारेमा जानकारी दिदै बिभागले ४ हजार १ सय २७ खाद्य नमुनाहरुको परिक्षण गर्दा २ सय २४ वटा नमूना खान अयोग्य रहेको पाइएको समेत जनाएको छ । दाना, होटल, राजमार्गका रेष्टुरेन्ट लगाएतको ८ हजार ८ सय ६६ पटक अनुगमन गरिएको बिभागले जानकारी दिएको छ ।

सोहि अवधिमा नै १२ वटा अन्तराष्ट्रिय सीममा अवस्थीत खाद्य आयात निर्यात गुणस्तर प्रमाणिकरण कार्यालयहरुमा ५१ हजार ७ सय ६७ वटा खाद्य पदार्थका नमूनाहरु परिक्षण गरिएको बिभागका महानिर्देशक डा मतिना जोशी वैद्यले जानकारी दिए । उनले गण्डकी प्रदेशमा खाद्य परिक्षण केन्द्र स्थापना गरिएको र फलफूलमा विषादी प्रयोगको गुनासो बढेपछि सवै प्रदेशमा एकै पटक अनुगमन गरिएको र सो क्रममा फलफूल पकाउन प्रयोग हुने रसायन प्रयोग गरेको पाइएको जानकारी दिए ।

त्यस्तै बिभागले संक्रामक रोग नियन्त्रण लक्षित बिशेष अनुगमनलाई पनि तीव्रता दिएको जनाएको छ ।

प्रकाशित मिति: मंगलबार, साउन १७, २०७९

प्रतिक्रिया दिनुहोस्