न्यायाधीशसँग टेलिफोनबाट मोलमोलाइ गर्ने अधिवक्ता रुद्र पोखरेलका नाममा सात दिने म्याद जारी

समाचार

गृहपृष्ठ
समाचार

न्यायाधीशसँग टेलिफोनबाट मोलमोलाइ गर्ने अधिवक्ता रुद्र पोखरेलका नाममा सात दिने म्याद जारी

... मंगलबार, साउन ३, २०७९

काठमाडौं जिल्ला अदालतका न्यायाधीश राजकुमार कोइरालासँग अभियुक्त इच्छाराज तामाङलाई छुटाउन मोलमोलाइ गरेको आवाज बाहिरिएका अधिवक्ता रुद्रप्रसाद पोखरेलका नाउँमा नेपाल कानून व्यवसायी परिषदले सात दिने म्याद जारी गरेको छ ।

झापा जिल्ला जुरोपानी-८ स्थायी ठेगाना भई हाल उच्च अदालत बार एसोसिएशन पाटनका सदस्य पोखरेलले कानून व्यवसायको सिलसिलामा मोलमोलाइ गरेको उजुरी र कारबाहीको प्रतिवेदन प्राप्त भएको परिषदले जनाएको छ ।

कानून व्यवसायीको आचारसंहिता, २०५१ विपरीत कार्य गरेकोले कारबाहीको प्रतिवेदन प्राप्त भएको सन्दर्भमा अनुशासन समितिको नियमावली बमोजिम सूचना प्रकाशित गरिएको म्यादमा उल्लेख छ ।

आजका मितिले सात दिनभित्र जवाफ पेश गर्न परिषदले गोरखापत्रमा सूचना निकालेको हो । उनी र न्यायाधीश कोइरालाबीच १० करोड रुपैयाँ लेनदेन गर्ने र त्यसका लागि प्रधानन्यायाधीश चोलेन्द्रशमशेर राणालाई पनि मिलाउने पोखरेलले बताएका थिए ।

पोखरेलको जवाफपछि परिषदले उनको अधिवक्ताको प्रमाणपत्र खारेज गर्नेसम्मको निर्णय हुन सक्नेछ । न्यायाधीश कोइरालामाथि न्यायपरिषदको छानबिन समितिले छानबिन गरिरहेको छ । टेलिफोनमा उनले अभियुक्त इच्छाराजलाई धरौटीमा रिहा गरिदिने तर लेनदेनको कुरा मिडियामा "छ्याल्लब्याल्ल" हुन नहुने बताएका थिए ।

पोखरेलले सोही अडियो रेकर्ड सुनाएर इच्छाराजबाट रकम लिएको तर उनी नछुटेको कारण इच्छाराजको परिवारबाट अडियो रेकर्ड सार्वजनकि गराइएको हो ।

इच्छाराज तामाङले सिभिल सहकारीमार्फत् सयौं व्यक्तिलाई ठगेको अभियोगमा पक्राउ गरी मुद्दा चलाइएको अवस्थामा अधिवक्ता पोखरेल र न्यायाधीश कोइरालाबीच घुसमार्फत् रिहा गराउन मोलमोलाइ भएको कुराकानीको रेकर्ड बाहिरिएको थियो ।

प्रकाशित मिति: मंगलबार, साउन ३, २०७९

प्रतिक्रिया दिनुहोस्