बिहानै पानी पर्दा काठमाडौंमा दुई दिनसम्मको उखरमाउलो गर्मी शान्त, मंगलबार मनसुन सक्रिय हुन सक्ने

मौसम

गृहपृष्ठ
मौसम

बिहानै पानी पर्दा काठमाडौंमा दुई दिनसम्मको उखरमाउलो गर्मी शान्त, मंगलबार मनसुन सक्रिय हुन सक्ने

... सोमबार, साउन २, २०७९

काठमाडौंमा शनिबार र आइतबार अत्याउने खालको उखरमाउलो गर्मीलाई सोमबार बिहानै परेको पानीले शान्त पारेको छ । तापक्रम लगातार बढिरहेका बेला सोमबार बिहान काठमाडौंमा वर्षा भएको छ । जसकारण ‘हल्का राहत’ महसुस भएको हो । उपत्यकामा आइतबार अधिकतम तापक्रम ३२.३ डिग्री सेल्सियस पुगेको थियो ।

तर, मनसुनको न्युन चापिय रेखा हाल पनि सरदर स्थानभन्दा दक्षिण तिर रहेकाले मनसुन सक्रिय हुन नसकेको मौसम पूर्वानुमान महाशाखाका मौसमविद् हिरा भट्टराईले जानकारी दिए ।

आज दिउँसो पहाडी भूभागका थोरै स्थान र बाँकी भूभागका एक-दुई स्थानमा हल्कादेखि मध्यम वर्षाको आकलन महाशाखाले गरेको छ ।

मंगलबार भने मनसुन केही सक्रिय भएर देशका विभिन्न क्षेत्रमा वर्षा हुनसक्ने ठानिएको छ । विशेषगरी सुदूरपश्चिम, कर्णाली, लुम्बिनी र गण्डकीका केही स्थान र बाँकी प्रदेशका थोरै स्थानमा मंगलबार वर्षाको सम्भावना छ ।

मंगलबार राति गण्डकी, लुम्बिनी, कर्णाली र सुदूरपश्चिमका एक-दुई स्थानमा भारी वर्षाको पनि सम्भावना रहेको महाशाखाले बुलेटिनमा उल्लेख गरेको छ ।

बुधबार देशका पहाडी भेगका धेरै स्थान र अन्य भूभागका केही स्थानमा वर्षाको सम्भावना छ । सुदूरपश्चिम, कर्णाली, लुम्बिनी र गण्डकीका केही स्थानमा भारी वर्षाको प्रक्षेपण महाशाखाले गरेको छ ।

प्रकाशित मिति: सोमबार, साउन २, २०७९

प्रतिक्रिया दिनुहोस्