भारतीय आयल निगमलाई तेलको भुक्तानी गर्न टेकुको ५१ रोपनी जग्गा वाणिज्य बैंकमा धितो

अर्थ-वाणिज्य

गृहपृष्ठ
अर्थ-वाणिज्य

भारतीय आयल निगमलाई तेलको भुक्तानी गर्न टेकुको ५१ रोपनी जग्गा वाणिज्य बैंकमा धितो रु. २५ अर्ब आवश्यक परेकोमा कर्जाबाट ३ अर्ब मात्रै पाउँदैछ नेपाल आयल निगम

... शुक्रबार, जेठ ६, २०७९

नेपाल आयल निगमले भारतीय आयल निगमलाई तेलको रकम भुक्तानी गर्न टेकुस्थित केन्द्रीय कार्यालय रहेको जग्गा राष्ट्रिय वाणिज्य बैंकमा धितो राखेको छ । ५१ रापनी जेथा धितो राखेर ३ अर्ब रुपैयाँ निगमले कर्जा लिने निर्णय भैसकेको निगमका उच्च अधिकारीले जानकारी दिए ।

भारतीय निगमलाई तिर्न बाँकी १२ अर्ब ८० करोड रुपैयाँ भुक्तानीका लागि सरकारको सँग निगमले रकम मागेको थियो । तर अर्थ मन्त्रालयले निगमकै जग्गा धितोमा राखेर रकम भुक्तानी गर्न निर्देशन दिएको थियो ।

"हालसम्मको बक्यौता १२ अर्ब ८० करोड र अब ल्याउन तिर्नु पर्ने त्यत्ति नै थप रकम समेत गरी २५ अर्ब रुपैयाँ आवश्यक रहेकोमा ३ अर्ब ऋणले तेलको भुक्तानी गर्न पुग्दैन, भाउ बढाउनुको विकल्प छैन", निगमका एक उच्च अधिकारीले नेपालीत्व समाचारलाई बताए । विश्वव्यापी रुपमै इन्धनको भाउ बढिरहेको बेला महँगोमा किनेर परल मूल्यभन्दा सस्तोमा बेच्नु पर्दा जायजेथाले पनि नपुगेर टाट पल्टिने अवस्था आएको ती अधिकारीले बताए ।

गत वर्ष यही समयमा बढाउनु पर्ने भाउ नबढाइएको र हाल पनि स्थानीय निर्वाचनका कारण बढाउन सरकारले नदिनाले निगमले तेल खरिदको रकम तिर्न नसकेको निगमका अधिकारी बताउँछन् । सबै पेट्रोलियममा प्रति लिटर १५ रुपैयाँ नबढाइकन भारतीय निगमलाई तिर्ने रकम उठ्दैन, उनले भने । ।

पेट्रोलियमको खपत घटाउन सवारी साधन सञ्चालनमा जोरबिजोर प्रणाली लागू गर्न प्रस्ताव गरेको थियो । खाना पकाउन एलपीजी ग्यासको सट्टा बिजुली प्रयोग गर्ने व्यवस्था गर्न माग गरेकोमा त्यो पनि प्रभावकारी कार्यान्वयन नभएको निगमको गुनासो छ । युक्रेन युद्धको असर र परल मूल्य बढेको विषयलाई मितव्ययिता र वैकल्पिक व्यवस्थाबाट पुर्ताल गर्नेतर्फ देशका कोही पनि गम्भीर नबनेको भन्दै निगमका अधिकारीहरुले चिन्ता व्यक्त गरेका छन् ।

सरकारले प्रति लिटर इन्धनमा ६२ रुपैयाँ कर लिने गरेकोले कर छूट दिएमा समग्र बजारमै सकारात्मक प्रभाव पर्ने प्रस्ताव समेत सरकारले नसुनेको निगमका अधिकारीहरु गुनासो गर्छन् ।

प्रकाशित मिति: शुक्रबार, जेठ ६, २०७९

प्रतिक्रिया दिनुहोस्