सशस्त्र प्रहरी महानिरीक्षक खनालले पाए अवकाश, सङ्गठन भयो नेतृत्वविहीन

समाचार

गृहपृष्ठ
समाचार

सशस्त्र प्रहरी महानिरीक्षक खनालले पाए अवकाश, सङ्गठन भयो नेतृत्वविहीन

समाचारदाता सोमबार, चैत २८, २०७८

सशस्त्र प्रहरी बलका महानिरीक्षक (आईजीपी) शैलेन्द्र खनालले अवकाश पाएका छन् । चार वर्षे कार्यकाल पूरा गरेर महानिरीक्षक खनालले सोमबारबाट अवकाश पाएका हुन् । उनले अवकाश पाएसँगै सशस्त्र प्रहरी बल नेतृत्वविहीन भएको छ ।

खनाल २७ चैत २०७४ मा सशस्त्र प्रहरी बलको महानिरीक्षकमा नियुक्त भएका थिए । उनले अवकाश पाए पनि सरकारले नयाँ महानिरीक्षकको टुङ्गो लगाउन सकेको छैन ।

सशस्त्र प्रहरीमा हाल एआईजी रहेका पुष्पराज केसी र रामशरण पौडल दुवैको अवधि निकै कम मात्रै छ । दुवै जनाले आउँदो वैशाख १९ गते अवकाश पाउँदै छन् । दुवैजना अवकाशप्राप्त महानिरीक्षक खनालकै ब्याचमेट हुन् । महानिरीक्षक बन्ने पालो उनीहरूकै हो । तर उनीहरूमध्येबाट महानिरीक्षक बनाइएमा निकै छोटो समयका लागि मात्र हुने छ र तुरुन्तै नयाँ प्रक्रियामा पनि जानु पर्ने हुन्छ ।

नयाँ नेतृत्वका लागि बढुवा सिफारिस समितिले सिफारिस गर्नुपर्छ । सोही सिफारिसको आधारमा मन्त्रिपरिषद् बैठकले नयाँ नेतृत्व चयन गर्ने हो । तर अहिलेसम्म बढुवा सिफारिस समितिको बैठक पनि बसेको छैन । लोकसेवा आयोगका अध्यक्ष, प्रधानमन्त्री कार्यालयका सचिव र गृहसचिव नेतृत्वमा रहने बढुवा सिफारिस समितिले महानिरीक्षक सिफारिस गर्छ ।

बैशाख १९ पछि नेतृत्व लिनका लागि भने हालका डीआईजीहरू राजु अर्याल, नारायणदत्त पौडेल र चन्द्रप्रकाश गौतम दौडमा छन् । अर्याल र पौडेल २०५४ चैतमा नेपाल प्रहरीको प्रहरी निरीक्षकबाट सेवा प्रवेश गरेका हुन् । गौतम भने २०५२ वैशाखमा नेपाली सेनाको सहायक सेनानीबाट आएका हुन् । सशस्त्र प्रहरीको स्थापनासँगै उनीहरू २०५८ मा एकैपटक सशस्त्र प्रहरीमा स्थानान्तरण भएका थिए ।

हाल अर्याल पहिलो, पौडेल दोस्रो र गौतम तेस्रो वरीयतामा छन् । वरीयतामा चौथो नम्बरमा रहेका डिआइजी वंशीराज दाहाल पनि एआईजीको दौडमा छन् । सशस्त्र प्रहरी बलमा दुईजना मात्रै एआईजी रहने व्यवस्था छ ।

अहिलेका डीआईजीमध्ये दुईजनालाई एआईजीमा नियुक्त गर्ने र उनीहरूमध्येबाट एकजनालाई आईजीपीमा नियुक्त गर्नुपर्ने हुन्छ । त्यसका लागि अहिलेदेखि नै प्रक्रिया थाल्नुपर्ने हुन्छ । तर बढुवा सिफारिस समितिले त्यस्तो गर्न सकिरहेको छैन ।

प्रकाशित मिति: सोमबार, चैत २८, २०७८

प्रतिक्रिया दिनुहोस्