पोखराकै जस्तो विन्ध्यवासिनी मन्दिर बनाएर पनौतीमा मनाइँदैछ चैते दशैँ

धर्म-संस्कृति

गृहपृष्ठ
धर्म-संस्कृति

पोखराकै जस्तो विन्ध्यवासिनी मन्दिर बनाएर पनौतीमा मनाइँदैछ चैते दशैँ छैटौँ गुरुकुल सञ्चालन गर्न खोज्दैछन् स्वामी निशेषानन्द

... बिहीबार, चैत २४, २०७८

यस वर्षको चैते दशैँ पर्सि चैत २६ गते परेको छ । यस अवसरमा देशका विभिन्न शक्तिपीठहरुमा देवी भगवतीको साधना भैरहेको छ । यसै क्रममा काभ्रेको पनौती श्रीखण्डपुरमा पोखराको जस्तै विन्ध्यवासिनी मन्दिर बनाएर उद्घाटन गरिएको छ । राष्ट्रियसभाका अध्यक्ष गणेशप्रसाद तिमिल्सिनाले मन्दिर उद्घाटन गरेका हुन् । मन्दिरको प्राणप्रतिष्ठा गरिसकिएको छ । पोखराकै जस्तो विन्ध्यवासिनी मन्दिर पनौतिमा बनाइएको हो ।

पोखराको विन्ध्यवासिनी मन्दिरका पीठाधीश स्वामी निशेषानन्दको नेतृत्वमा पनौतीमा पनि विन्ध्यवासिनी मन्दिर स्थापना गरेर संस्कृत गुरुकुल खोल्न लागिएको हो । चैते दशैंसँगै त्यहाँ देवी भागवत् नवाह महायज्ञ पनि आयोजना गरेर देवीको उपासनाको काम भैरहेको छ ।

स्वामी निशेषानन्द पोखराको विन्ध्यवासिनीमा बसेर देवीको साधना गर्ने आबाल ब्रह्मचारी सिद्धपुरुष हुन् । उनले यसअघि कास्की, कैलाली र अछाम समेत पाँच ठाउँमा गुरुकुल सञ्चालन गरिरहेका छन् । पनौतीको गुरुकुल सञ्चालन गर्ने खर्च जुटाउन पनि शक्तिसाधना महायज्ञ गरिएको विन्ध्यवासिनी आध्यात्मिक प्रतिष्ठान काभ्रेले जनाएको छ । राष्ट्रियसभाका अध्यक्ष तिमिल्सिनाले स्वामी निशेषानन्दले अनवाद गरी प्रकाशन गरेको 'श्रीमदभागवत् दिग्दर्शन'' विमोचन गरे । उनको यो पन्ध्रौं कृति हो ।

चैते दशैं शुरु भएको प्रतिपदाको दिन चैत १९ गते राष्ट्रिय समावेशी आयोगका अध्यक्ष डा. रामकृष्ण तिमल्सेनाले उद्घाटन गरेको देवी भागवत नवाह ज्ञान महायज्ञ २७ गते समापन गर्ने कार्यक्रम छ ।

नवाहमा भाष्कर ब्रह्मचारी नारायण देवकोटाले कथा वाचन गरिरहेका छन् । रुद्राभिषेक र गायत्रीहोम पनि भैरहेको आयोजक समितिका अध्यक्ष कृष्णप्रसाद तिमिल्सिनाले बताए । श्रीखण्डेश्वरमा विन्ध्यवासिनी मन्दिरसँगै यज्ञमण्डप पनि बनाइएको छ । अब छात्राशाला बनाउने तयारी गरिएको छ । आदर्श विद्या मन्दिरका सञ्चालक समेत रहेका समाजसेवी रामप्रसाद तिमल्सिनाले त्यहाँ बहूद्देश्यीय सामुदायिक भवन, सन्त निवास र सत्सङ्ग भवन पनि निर्माण गरेर श्रीखण्डपुरलाई आध्यात्मिक र धार्मिक पर्यटकीयस्थलका रुपमा विकास गरिने बताए ।

पुस्तक विमोचन समारोहमा बोल्दै पनौतीका नगरप्रमुख भीमप्रसाद न्यौपानेले आफ्नो नगरमा जनस्तरबाट भएको कामलाई सहयोग गर्नु नगरपालिकाको कर्तव्य भएको भन्दै आवश्यक सबै सहयोग गर्ने वचन दिए ।