अख्तियारले समात्ने सुइँको पाएपछि मालपोतका कर्मचारीहरु योजना आयोगमा

प्रशासन

गृहपृष्ठ
प्रशासन

अख्तियारले समात्ने सुइँको पाएपछि मालपोतका कर्मचारीहरु योजना आयोगमा बुढानीलकण्ठमा खटिएका सर्वेक्षक र अमिन साँझ लगनखेलबाट एक लाख रुपैयाँसहित पक्राउ

... बुधबार, चैत २३, २०७८

अर्बपति खरिदार लक्ष्मण बस्नेत घुस लिँदालिँदै समातिएपछि मालपोत कार्यालय चाबहिलमा उनीसँगै वर्षौंसम्म काम गरेका सहकर्मीहरु त्रसित बन्दै सरुवा मागेर हिँडेका छन् । त्यसरी सरुवा मागेर राष्ट्रिय योजनामा जानेहरुमा कृष्णप्रसाद पोखरेल र ओम आचार्य छन् । अर्का एक जनाले भने भैसकेको सरुवा थमौती गरेर चाबहिलमै बसेका छन् ।

अहिले कर्मचारी सरुवा गर्ने समय होइन तर सामान्य प्रशासन मन्त्रालयले उनीहरुलाई चाबहिल मालपोतबाट योजना आयोगमा पठाइदिएको हो । ट्रेड युनियनका नेताहरुलाई प्रभावमा पारेर सोर्सफोर्सको आधारमा उनीहरुले बेमौसममै घुस खाने अड्डाबाट प्रशस्त भत्ता खाने अड्डामा गएका हुन् । सहकर्मी लक्ष्मण बस्नेत पक्राउ परेको र आफूहरु पनि नगरानीमा परेको भन्दै उनीहरुले एक महिनायता मोबाइलमा कुरा नगर्ने र कहीँ कसैलाई नभेट्ने गरेको मालपोत स्रोतले बताएको छ ।

नापी र मालपोतका कर्मचारीको मिलेमतोमा जग्गाको स्वामित्व नै गडबड गर्ने काम व्यापक बनेको भन्ने गुनासो चाबहिल मालपोतमा केही वर्षदेखि व्यापक छ । पक्राउ परेका लक्ष्मण बस्नेत ८ वर्षदेखि चाबहिल मालपोतमा थिए भने कृष्ण पोखरेल र ओम आचार्य ६ वर्षदेखि त्यहाँ थमौती गरेर बसेका थिए । कर्मचारीको सरुवा २ वर्षमा हुने गरेको भएपनि उनीहरु जसरी पनि चाबहिलमै टिकिरहेका थिए ।

ती तीन जनासंगै अन्य कर्मचारीको मिलेमतोमा साढे तीन सयभन्दा बढी फाइल निर्णय नगरेर राखिएको पीडितहरुले जानकारी दिए । घुसको कुरो मिले फाइल अघि बढ्ने अन्यथा झुलाइरहने काम कर्मचारीले गरेको गुनासो पीडितहरुले ठाउँठाउँमा पोख्दै हिँडेका छन् । घुस बिना काम नगरेका फाइलहरुको चाङसँगै अख्तियारमा उजुरीको चाङ पनि चुलिँदो छ भने पीडितहरुले प्रहरी पनि गुहार्न थालेका छन् । त्यस्ता कर्मचारीलाई जसरी पनि समात्ने प्रयासमा अख्तियार र प्रहरी दुवै रहेको सुइँको पाएर नै उनीहरु कानूनले तोकेको सरुवाको सिजन नहुँदै बसीबसी धेरै भत्ता खान पाइने योजना आयोगमा सरुवाका लागि शक्ति केन्द्रहरुबाट दवाव आएको सामान्य प्रशासन स्रोत बताउँछ ।

ट्रेड युनियनका नेताहरुले यस्तै कर्मचारीको सरुवा र थमौती गरेर थप आर्जन गर्ने गरेको अर्को गुनासो छ । सरुवाको समय कानूनले नै तोकेको भएपनि ती दुई कर्मचारीलाई अहिले सरुवा गर्दा कर्मचारी नेता र सामान्य प्रशासनका हाकिमहरुले दोहोरो लाभ लिएका छन् । नेताहरुले कृष्ण पोखरेल र ओम आचार्यले चाबहिल नछोड्दै अन्य दुई कर्मचारीलाई चाबहिलस्थित उनीहरुको ठाउँमा पठाउन भ्याइसकेका छन् ।

सेवाग्राहीलाई झुलाएर घुस माग्ने त मालपोत र नापीका कर्मचारीको परिचय बनेकै हो, दर्ता हुन बाँकी जग्गा धेरै नै चाबहिल कार्यालयको क्षेत्रधिकारमा रहेको र दर्ता भएका जग्गाका धनी पनि काठमाडौमा नबस्ने हुनाले मालपोत र नापीका कर्मचारीबाट जग्गा असुरक्षित भएका उजुरी विभिन्न निकायमा बढ्दैछन् । हालसाविक गर्ने र भिडाउने नाममा जग्गाधनीको जानकारीबिना नै क्षेत्रफल थपघट गर्ने काम केही वर्षयता चाबहिल कार्यालयमा व्यापकै बनेको गुनासो छ ।

चाबहिल नापी र मालपोतमा अख्तियार र प्रहरीले अरु पनि बदमास कर्मचारीहरु समात्ने प्रयास गरिरहेको थाहा पाएरै कृष्ण पोखरेल र ओम आचार्यले हत्तपत्त योजना आयोगमा सरुवा मिलाएपनि उनीहरुको ठाउँमा गएका नयाँ र पुराना बदमासहरु कुनै पनि बेला समातिन सक्ने अवस्था रहेको भूमि व्यवस्था स्रोतले बताएको छ । साथै बदनियतसाथ क्षेत्रफल घटबढ गरेका फाइलहरुको छानबिन गरी कुनै पनि समयमा बदमासीमा संलग्नहरुमाथि कारबाही हुन सक्ने पनि सो स्रोतको भनाइ छ ।

पछिल्लो समाचार अनुसार चैत २२ गते मङ्गलबार साँझ चाबहिल नापीका दुई अमिनलाई अख्तियारले लगनखेलबाट नियन्त्रणमा लिएको छ । नापी कार्यालय चावहिल १ नं. नापी टोली, बुढानीलकण्ठमा कार्यरत सर्भेक्षक बिनोद के.सी. र अमिन प्रकाशराज भट्टलाई अख्तियारको हिरासतमा राखिएको छ ।

उनीहरुले जग्गाको हालसाविक गर्ने क्रममा सेवाग्राहीसँग घुस/रिसवत माग गरेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोग, टंगालबाट टोली खटाएर समातिएको अख्तियारका प्रवक्ता श्यामप्रसाद भण्डारीले बताएका छन् । बुढानीलकण्ठको फिल्डमा एक लाख रुपैयाँ घुस बुझेर निवासतर्फ जाने क्रममा उनीहरुलाई उक्त घुस रकमसहित समातिएको भण्डारीले बताए । ललितपुर महानगरपालिका वडा नं. -५, लगनखेलको महालक्ष्मी मार्गबाट केसी र भट्टलाई अख्तियारको टोलीले समातेर टंगालको हिरासतमा लगेको हो ।

प्रकाशित मिति: बुधबार, चैत २३, २०७८