ओलीले गरे रुपन्देहीको तिलोत्तमामा भ्यु-टावर उद्घाटन

राजनीति

गृहपृष्ठ
राजनीति

ओलीले गरे रुपन्देहीको तिलोत्तमामा भ्यु-टावर उद्घाटन भाषणमा भने - भूमिहीनका लुकाइएका फाइल खोज्न प्रधानमन्त्री देउवा दिल्ली जान लागेका छन्

समाचारदाता मंगलबार, चैत १५, २०७८

नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले वर्तमान गठबन्धन सरकारले अव्यवस्थित बसोबासी तथा सुकुम्बासी समस्या समाधान आयोग खारेज गरेर भूमिहीनलाई अलपत्र पारेको आरोप लगाएका छन् ।

आफ्नो नेतृत्वको सरकारले आयोग बनाएर पुर्जा वितरण गर्न ठिक्क पारेका बेला सरकार नै परिवर्तन भएको दावी गरे । आफूलाई हटाएर बनेको गठबन्धन सरकारले आयोग नै खारेज गरेर भूमिहीनलाई बेघर बनाएको ओलीको भनाइ छ । गठबन्धन सरकारले अनेक बहाना खोज्न अघिल्लो सरकारमाथि भूमिहीनको फाइल लुकाएको आरोप लगाएको पनि उनले दावी गरे ।

रुपन्देहीको तिलोत्तमा नगरपालिकाले शङ्करनगर वन वाटिकामा निर्माण भएको बहुउद्देश्यीय भ्यु-टावरको मङ्गलबार उद्घाटन गर्दै एमाले अध्यक्ष ओलीले यस्तो दावी गरेका हुन् । ‘आयोग खारेज गरेर पुर्जा वितरणको लागि मैले ठिक्क पारेको फाइल यो सरकारले लुकाएको छ,’ उनले भने । लुकाइएको फाइल खोज्न प्रधानमन्त्री देउवा दिल्ली जान लागेको भन्दै उनले व्यङ्ग्य कसेका थिए । ‘अहिले उहाँहरू अघिल्लो सरकारले फाइल लुकाएको भन्दै हिँड्नु भएको छ, अब प्रधानमन्त्री देउवा फाइल खोज्न दिल्ली जाँदै हुनुहुन्छ,’ उनले भने ।

गएको चुनावपछि आफ्नो नेतृत्वमा बनेको सरकारले अन्तरिक्षमा आफ्नो स्पेस र समुन्द्रमा नेपालको अधिकारसमेत स्थापित गर्न सफल भएको दावी ओलीले गरे ।

मङ्गलबार उद्घाटन गरिएको बहुउद्देश्यीय भ्यु-टावर ठीक चार वर्ष अघि अर्थात् २०७४ साल चैत १५ गते शिलान्यास गरिएको थियो । शङ्करनगर वन विहार तथा अनुसन्धान केन्द्र (वन वाटिका) मा बनेको उक्त भ्यू-टावर १० तलाको छ, जसको उचाइ १३४ फिट रहेको छ ।

तिलोत्तमा नगरपालिकाले यो भ्यु-टावर, भ्यु-टावर मात्र नभई बहुउद्देश्यीय भवनको रूपमा निर्माण गरिएको दावी गरेको छ । तिलोत्तमा नगरपालिका र शङ्करनगर वन विहारको संयुक्त लगानीमा निर्माण गरिएको टावरमा पहिलोदेखि छैठौँ तलासम्म व्यावसायिक प्रयोजनका लागि संरचना निर्माण गरिएका छन् । सातौँ तलादेखि मात्रै दृश्यावलोकनको लागि प्रयोग हुने नगरपालिकाले जनाएको छ ।

साढे ११ करोड रुपैयाँभन्दा बढी लागत परेको भ्यु-टावर निर्माणमा ७० प्रतिशत खर्च तिलोत्तमा नगरपालिकाले र ३० प्रतिशत खर्च शङ्करनगर वन विहार तथा अनुसन्धान केन्द्रले व्यहोरेका छन् ।

कुल २५ हजार १२२ वर्ग फिट क्षेत्रफलमा निर्माण गरिएको भ्यु-टावरमा सुविधायुक्त रेष्टुराँ र पर्यटक विश्रामस्थल, रिसर्च कक्ष, डिपार्टमेन्ट स्टोर, कार्यालय कक्ष, शौचालयसहित वातानुकूलित कोठा तथा पुस्तकालयलगायतका संरचना रहेको नगरप्रमुख वासुदेव घिमिरेले जानकारी दिए । भ्यु टावरबाट बुटवल, भैरहवा र लुम्बिनीसम्म आँखाले सजिलै देख्न सकिन्छ भने दुरबिनको प्रयोगबाट भारतको गोरखपुर, नौतनवासम्मका सहरहरू देख्न सकिन्छ ।

लिफ्ट सुविधासहित बनेको भ्यु-टावरसँगै दुई बिघा क्षेत्रफलमा अन्य पर्यटकीय पूर्वाधार र संरचनाहरू समेत निर्माण भइरहेका छन् । भ्यु टावरको उत्तरतर्फ स्वीमिङ पुल र अगाडि म्युजिकल फाउन्टेन निर्माण भइरहेको छ । यस्तै बालबालिकाको लागि खेल मैदान र स्टेडियम निर्माण कार्य पनि सुरु भइसकेको छ ।

प्रकाशित मिति: मंगलबार, चैत १५, २०७८

प्रतिक्रिया दिनुहोस्