स्पष्ट कानून नहुदा हवाई यात्रुलाई सास्ती: राष्ट्रिय मानव अधिकार आयोग

समाचार

गृहपृष्ठ
समाचार

स्पष्ट कानून नहुदा हवाई यात्रुलाई सास्ती: राष्ट्रिय मानव अधिकार आयोग

.... सोमबार, चैत १४, २०७८

राष्ट्रिय मानव अधिकार आयोगले आयोजना गरेको ‘हवाई उडान र उपभोक्ता अधिकारसम्बन्धी छलफल’ कार्यक्रममा प्रतिवेदन पेश गरिएकाे छ।

आयोगले तोकिएका समयमा हवाई उडान हुने नहुनेबारे यात्रुलाई समयमै जानकारी गराउन माग गरेको छ । हवाई कम्पनी यात्रुको सहज र सुरक्षित यात्राप्रति गम्भीर नभएको, समयमा सही सूचना नदिने गरेकोले यात्रुले कठिनाइ भोग्न बाध्य भएको प्रतिवेदनमा उल्लेख गरिएकाे छ।

कार्यक्रममा आयोगकी उपसचिव मञ्जु खतिवडाले उडान नभएपछि समयमा नै यात्रुलाई जानकारी दिनुपर्ने व्यवस्था गरिनुपर्ने बताईन् । अनुगमनका क्रममा हवाई कम्पनी यात्रुको सहज र सुरक्षित यात्राप्रति गम्भीर नभएको पाइएको, अनुगमनका क्रममा आठ घण्टासम्म पनि उडान नभएको, विमान कम्पनीले समयमा सही सूचना नदिने गरेको लगायत कारणले यात्रुले कठिनाइ भोग्नुपरेको, लामो समयसम्म विमानस्थलमा पर्खनुपर्ने कारण यात्रुले विमानस्थल परिसरमा महँगो र गुणस्तरहीन खानेकुरा खान बाध्य भएको पाइएको छ । आठ घण्टासम्म पनि हवाई उडान नभएपछि विमान सेवा कम्पनीले यात्रुलाई चिया खाजाको व्यवस्था नगरेको, साँझ भइसकेपछि उडान रद्द भएका खण्डमा यात्रुको सामान फिर्ता गर्ने गरिएको र यात्रुले आफ्नो व्यवस्थापन आफैँ गर्ने गरेको, विमान सेवा कम्पनीबाट केही बन्दोबस्त नहुने गरेको प्रतिवेदनमा उल्लेख छ ।

उडान नहुने जानकारी समयमा नदिँदा यात्रु बेखर्ची भएर आफन्तकामा बस्नुपरेको र विमान कम्पनीले कुनै जिम्मेवारी लिने नगरिएको पाइएको छ । पहाडी भेगमा उडान भर्ने समिट एयरलाइन्सले यात्रुलाई बिहानै विमानस्थलमा बोलाउने, दिनभरि कुराउने तथा विनाजानकारी रद्द गर्ने जस्ता कार्य गरेको आयोगकी उपसचिव खतिवडाले जानकारी दिईन् ।

विमान कम्पनीले आफूखुसी भाडादर बढाउने गरेको पाइएको छ । आयोगका कार्यवाहक अध्यक्ष डा सूर्यप्रसाद शर्मा ढुङ्गेलले विमानस्थलमा यात्रुको मानवअधिकार रक्षा र उपभोक्ता अधिकारको प्रवद्र्धनका लागि सरोकारवाला पक्षसँग छलफल गर्दै सुझाव सङ्कलन भइरहेको बताए । आयोगका सदस्य मिहिर ठाकुरले हवाई क्षेत्रको समस्या समाधानका लागि पहल भइरहेको बताए ।

नेपाल नागरिक उड्डयन प्राधिकरणका कामु महानिर्देशक हंसराज पाण्डेले यात्रुको सुरक्षित उडान, भाडादर तोक्नेलगायत उडान प्रक्रियालाई व्यवस्थापन गर्नका लागि ऐन र कानून भए पनि उडान ढिला हुँदा यात्रुको सुरक्षा र अन्य व्यवस्थापन कसले गर्ने भन्ने स्पष्ट कानून नभएको बताए ।

प्राधिकरणका उपप्रबन्धक ज्ञानेन्द्र भूलले त्रिभुवन विमानस्थल प्रतिघण्टा एक हजार ३५० यात्रु आवागमन गर्नसक्ने क्षमताको बने पनि अहिले प्रतिघण्टा दुई हजार ५०० भन्दा बढी यात्रुले आवागमन गरेको र हवाईजहाजको सङ्ख्या पनि धेरै बढेकाले उडानका क्रममा हुने एयर ट्राफिक जामका कारण यात्रुलाई समस्या परेको बताए । उनले त्रिभुवन अन्तर्राष्ट्रिय विमानस्थलको क्षमता विस्तार गरिरहेको बताए।

नेपाल एयरलाइन्सका नायब महाप्रबन्धक कर्णबहादुर थापाले यात्रुलाई सहज गर्न आफूहरुले हवाई उडानमा सुधार गरिरहेको बताए। बुद्ध एयरका सञ्चार अधिकृत दीपेन्द्र कर्णले भौगोलिक बनावट र मौसमका कारण हवाई उडान ढिला हुने गरेको बताउनुभयो । उनले सबै प्रदेशलाई जोड्नका लागि प्रदेश मुकामबाट प्रदेश मुकाम हवाई उडान गरिएको जानकारी दिए ।

यती एयरलाइन्सका स्टेशन म्यानेजर फुरी तामाङले विमानस्थलमा पर्याप्त भौतिक पूर्वाधार नहुँदा उडान समयमा नहुँदा यात्रुलाई समस्या हुने गरेको बताए।

प्रकाशित मिति: सोमबार, चैत १४, २०७८

प्रतिक्रिया दिनुहोस्