सत्तासीन नेपाली कांग्रेस र प्रमुख प्रतिपक्षी दल नेकपा (एमाले)ले स्थानीय तह निर्वाचनका सन्दर्भमा केन्द्रीय र स्थानीय दुवै तहबाट चुनावी घोषणापत्र जारी गर्ने भएका छन् ।
एमाले केन्द्रीय कमिटी बैठकले ‘पार्टीको केन्द्रीय कमिटीका तर्फबाट वर्तमान राजनीतिक परिस्थिति, पार्टीका मुख्य नीतिहरू, आगामी कार्यदिशा तथा ‘समृद्ध नेपाल र सुखी नेपाली’ को आकाङ्क्षा पूरा गर्न राष्ट्रिय स्तरमा भएका काम र स्थानीय विकास तथा समृद्धिसम्बन्धी हाम्रो परिकल्पना, कार्यक्रम र मार्गचित्र समेटेर घोषणापत्र सार्वजनिक गर्ने’ निर्णय गरेको थियो ।
पार्टी केन्द्रीय कार्यालयबाट चुनावी घोषणा पत्र बनाए पनि स्थानीय तहले अलग्गै प्रतिवद्धतापत्र बनाउनु पर्ने निर्णय पनि उक्त बैठकले गरिसकेको छ । ‘केन्द्रीय नीतिको मार्गदर्शन र केन्द्रले तयार गरेको ढाँचामाथि आधारित रहेर स्थानीय तहमा हाम्रा उपलब्धी, हामी पराजित भएका ठाउँमा विगतमा हामीले गरेको प्रतिबद्धता र विपक्षीले विजय हासिल गरेको कारण त्यसमा आएको अवरोधसमेतलाई समेटेर आगामी लक्ष्य र कार्ययोजनासहितका प्रतिबद्धता पत्र तयार गर्ने’ निर्णयमा उल्लेख छ ।
केन्द्रीय घोषणापत्र निमार्णका लागि एमालेले उपाध्यक्ष ईश्वर पोखरेलको नेतृत्वमा युवराज ज्ञवाली, प्रदीप ज्ञवाली, विष्णु रिमाल, प्रभु साह, देवेन्द्र दाहाल, युवराज खतिवडा, प्रभा बराल, दिनेशचन्द्र देवकोटा, सुशील ज्ञवाली, मनोजजङ्ग थापालगायतको घोषणापत्र मस्यौदा कार्यदल गठन गरेको छ ।
यसैगरी, कांग्रेसले चुनावी घोषणापत्र निमार्णका लागि महामन्त्री गगन थापालाई संयोजक तोकिसकेको छ । केन्द्रीय कार्यसम्पादन समितिको ३ फागुनको निर्णय अनुसार सभापति शेरबहादुर देउवाले महामन्त्री थापालाई ‘स्थानीय तह निर्वाचन-२०७९ घोषणापत्र तयारी समिति’को संयोजक तोकेका मुख्य सचिव कृष्णप्रसाद पौडेलले जानकारी दिए ।
केन्द्रमा तयारी समितिले घोषणापत्रका लागि काम गर्न सुरु गरे पनि स्थानीय तहलाई पनि आफ्नै अलग्गै घोषणापत्र बनाउन निर्देशन दिइएको पार्टी प्रवक्ता प्रकाशरण महतले बताए । ‘स्थानीय तहले पनि केन्द्रको नीति र कार्यक्रमसँग नबाझिने गरी आवश्यकता अनुसार अलग्गै चुनावी घोषणापत्र बनाउन निर्देशन दिइसकेका छौँ,’ प्रवक्ता महतले सञ्चारकर्मीलाई बताएका छन् ।
