प्रधानन्यायाधीश जबराविरुद्धको महाअभियोग प्रस्ताव संसदमा छलफलका लागि पेस

राजनीति

गृहपृष्ठ
राजनीति

प्रधानन्यायाधीश जबराविरुद्धको महाअभियोग प्रस्ताव संसदमा छलफलका लागि पेस

समाचारदाता आइतबार, फागुन २९, २०७८

प्रधानन्यायाधीश चोलेन्द्रशमशेर जबराविरुद्ध दर्ता भएको महाअभियोग प्रस्ताव प्रतिनिधिसभामा पेस गरिएको छ । जबराविरुद्ध दर्ता भएको महाअभियोग प्रस्ताव आइतबार बसेको प्रतिनिधिसभा बैठकमा पेस गरिएको हो ।

माओवादी केन्द्रका प्रमुख सचेतक देव गुरुङले बैठकमा महाअभियोग प्रस्ताव पेस गरेका हुन् । न्यायालयको विकृति विसङ्गति अन्त्य गर्न नसकेको, न्याय परिषद्को बैठक राख्न नसकेको तथा आफ्नो क्षेत्राधिकार अनुसार काम गर्न नसक्दा न्याय सम्पादनमा आँच आएकोले महाभियोग प्रस्ताव ल्याइएको गुरुङले बैठकमा जानकारी दिए ।

प्रधानन्यायाधीश जबराले संवैधानिक जिम्मेवारीलाई दुरुपयोग गरेको, उनका कार्य एकपछि अर्काे विवादास्पद बनेको र उनकै कारणले न्याय क्षेत्र अस्तव्यस्त बनेको गुरुङले बताए । प्रधान न्यायाधीश राणामा पदीय जिम्मेवारी, संवैधानिक आचरण र नैतिकता एवं कार्यक्षमतासमेत नदेखिएको कारणले निजलाई महाभियोग लगाउनुपर्ने पर्याप्त आधार र कारण एवं अवस्था विद्यमान रहेको जिकिर प्रस्तावमा गरिएको छ ।

महाअभियोग प्रस्ताव प्रतिनिधिसभा बैठकमा पेस गर्दै उनले यसलाई पारित गर्न सघाउन सबै सांसदहरूलाई आग्रह गरे ।
नेकपा माओवादी केन्द्रका देवप्रसाद गुरुङ, नेपाली कांग्रेसकी पुष्पा भुसाल र नेकपा एकीकृत समाजवादीका जीवनराम श्रेष्ठ प्रस्तावक र ९५ जना सांसद समर्थक रहेर यही फागुन १ गते जबराविरुद्ध महाअभियोगको प्रस्ताव संसद्‌ सचिवालयमा दर्ता गरिएको थियो ।

उक्त महाभियोग प्रस्तावमाथि सदनको आगामी बैठकमा छलफल गरिने जानकारी सभामुख अग्निप्रसाद सापकोटाले दिएका छन् । प्रतिनिधिससभाको अर्को बैठक आउँदो चैत २ गते बुधबार दिनको १ बजे बस्ने गरी आजको बैठक स्थगित भएको छ ।

एमाले सांसदहरूकाे नाराबाजीबीच सभामुख सापकाेटाले संसदकाे कार्यसूची अघि बढाएका थिए । बैठकमा सभामुख सापकोटाले संसद्‌मा निरन्तरको नाराबाजी र अवरोध हटाएर सदनलाई जनताका काममा प्रभावकारी बनाउने काममा सघाउन प्रमुख प्रतिपक्षको रूपमा रहेको नेकपा एमालेलाई विशेष आग्रह गरेका थिए ।

प्रकाशित मिति: आइतबार, फागुन २९, २०७८

प्रतिक्रिया दिनुहोस्