एकतर्फी युद्धविराम घोषणा गरी युक्रेनी दुई शहर कब्जा गर्दै रसिया

विश्वजगत्

गृहपृष्ठ
विश्वजगत्

एकतर्फी युद्धविराम घोषणा गरी युक्रेनी दुई शहर कब्जा गर्दै रसिया

एजेन्सी शनिबार, फागुन २१, २०७८

युक्रेनका दुई सहरमा रुसले शनिबार अस्थायी युद्ध विरामको घोषणा गरेको छ । रुसको रक्षा मन्त्रालयले मारीओपोल र भोल्नोभाखा सहरमा अस्थायी युद्ध विराम घोषणा गरिएको जनाएको हो ।

ती सहरमा रहेकालाई सहर छोडेर जाने मौका दिनका लागि अस्थायी युद्ध विराम गरिएको मन्त्रालयद्वारा जारी वक्तव्यमा लेखिएको छ । रक्षा मन्त्रालयले युद्ध विराम घोषणा गरेसँगै रुसी सेनाले ती सहरमा सबै कारबाही रोकेको अधिकारीहरूले जनाएका छन् ।

युक्रेनलाई आफ्नो नियन्त्रणमा लिनका लागि आक्रमण गरिरहेको रुसले धेरै मानवीय क्षति हुन नदिनका लागि यस्तो रणनीति लिएको देखिएको छ ।

“आज मार्च ५ तारिखको बिहान १० बजेदेखि युद्ध विराम लागु हुने छ, ती सहरमा रहेकाहरूलाई सहर छोड्न अनुरोध गर्दछौँ, मानवीय क्षति कम होस भन्ने उद्देश्यले अस्थायी युद्ध विराम गरिएको हो,” मन्त्रालयद्वारा जारी वक्तव्यमा लेखिएको छ ।

रुसी सेनाले गत फेब्रअरी २४ देखि युक्रेनमा कारबाही सुरु गरेको हो । अहिलेसम्म ठूलो जनधनको क्षति भइसकेको छ भने विश्वभरबाट रुसको आलोचना भएको छ ।

मारीओपोल सहरका मेयर भादिम बोयचेन्कोले रुसी सेनाद्वारा सहर नै बन्धक बनाइएकाले मानवीय सहायताको आवश्यकता रहेको भन्दै अपिल गरेपछि रुसले अस्थायी युद्ध विराम घोषणा गरेको हो ।

थोरै हताहतीमा युक्रेन युद्ध जित्ने रणनीति अन्तर्गत आक्रमणको दशौं दिनमा युक्रेनले एकतर्फी युद्धविराम घोषणा गरेको हो । घेराउ गरिरहेका दुई शहर मारिपोल र भोल्नोभाखामा युद्धविराम गरी रसियाले त्यहाँका नगरबासीलाई शहर छोड्न भनेको छ । मारिओवलका नगर प्रमुखले पनि नगरवासीले गगर छोडेर ज्यान जोगाउनुको विकल्प नभएको प्रतिक्रिया दिएका छन् ।

राजधानी किभ छोड्न पनि युक्रेनीहरु रेल स्टेशनतर्फ जाने क्रम बढेको समाचार एजेन्सीहरुले उल्लेख गरेका छन् ।

प्रकाशित मिति: शनिबार, फागुन २१, २०७८