खुंखार २२ विदेशी अपराधी पनि छुटे प्रजातन्त्र दिवसको कैद मिनाहामा (पूरै विवरणसहित)

मुख्य समाचार

गृहपृष्ठ
मुख्य समाचार

खुंखार २२ विदेशी अपराधी पनि छुटे प्रजातन्त्र दिवसको कैद मिनाहामा (पूरै विवरणसहित) नेपाली कारागारबाट भारतीय, भुटानी र अस्ट्रियन कैदी रिहा

नेपालीत्व समाचारदाता शनिबार, फागुन ७, २०७८

बहत्तरौं राष्ट्रिय प्रजातन्त्र दिवसमा कैद मिनाहा हुनेहरुमा २२ जना अपराधी पनि छन् । तीमध्ये भारतीय १८ जना, भुटानी ३ जना र अस्ट्रियन १ जना कैदमुक्त भएका छन् । कर्तव्य ज्यान मुद्दा, डाँका चोरी र नकावजनी चोरीमा संलग्न भै अदालतले अपराधी ठहर गरेका भारतीयहरुलाई कैदमुक्त गरिएको हो । भुटानीहरु कर्तव्य ज्यान र डाँका मुद्दामा दोषी ठहरिएर कैदमा थिए ।

अस्ट्रियन नागरिक डोमिनिक एडरलाई पोखरामा ज्यान मार्ने उद्योग गरेकोमा कैद ठेकिएको थियो । रविन श्रेष्ठले एडरविरुद्ध जाहेरी दिएका थिए भने कास्की जिल्ला अदालतले २०७६ जेठ १७ मा अन्तिम फैसला गरेको थियो । उनी पनि छुटेका छन् । बंगालका श्रीमन्त मण्डल नकावजनी चोरी अभियोगमा ताराबहादुर सुनारको जाहेरीले पक्राउ परी बुटवल उच्च अदालतबाट अन्तिम फैसलाबाट कैद गरिएका व्यक्ति हुन् ।

रिहा भएकामध्ये सबभन्दा धेरै १ सय १७ जना सवारी ज्यान मुद्दाका कैदी छन् । दोस्रोमा कर्तव्य ज्यान मुद्दा १ सय १५ जना रिहा भएका छन् । तेस्रोमा चोरी/डाँका मुद्दाका १ सय ११ जना, चौथोमा बहुविवाहका ८१ जना, पाँचौंमा ज्यान मार्ने उद्योगका ३२ जना र अन्य मुद्दाका ४५ जनाको कैद मिनाहा गरिएको गृह मन्त्रालयको विवरणमा छ ।

गृहले अन्य मुद्दामा राखेका मुद्दामा बोक्सीको आरोप, खोटा चलन, जबर्जस्ती करणी, ठगी, सरकारी कागज किर्ते र आगजनी र आत्महत्या दुरुत्साहन गरेको ठहर भै कैद बसेकाहरुलाई कारामुक्त गरेको हो । प्रमुख जिल्ला अधिकारी र कारागार प्रमुखको सिफारिसमा नकारात्मक सूचीमा नपरेका कैदीहरु रिहा गरिएको गृहले उल्लेख गरेको छ ।

गृह मन्त्रालयबाट प्राप्त पाँच सय एक कैदीको विवरण जो रिहा भए: -

प्रकाशित मिति: शनिबार, फागुन ७, २०७८