किसानका माग सम्बोधन नभए स्थानीय निर्वाचनमा अवरोध गर्ने सीके राउतको चेतावनी

राजनीति

गृहपृष्ठ
राजनीति

किसानका माग सम्बोधन नभए स्थानीय निर्वाचनमा अवरोध गर्ने सीके राउतको चेतावनी

समाचारदाता बुधबार, माघ २६, २०७८

जनमत पार्टीका अध्यक्ष सीके राउतले किसान आन्दोलनको माग सम्बोधन नभए स्थानीय निर्वाचनमा अवरोध गर्ने चेतावनी दिएका छन् ।

बुधबार वीरगन्जमा आयोजित पत्रकार सम्मेलनमा उनले किसान आन्दोलनको माग सम्बोधन नभई स्थानीय तह निर्वाचनको परिकल्पना गर्न नसकिने बताए ।

‘पहिले किसान आन्दोलनको माग सम्बोधन होस् अनि मात्र यहाँ स्थानीय तहको निर्वाचनको परिकल्पना गरौँ,’ राउतले भने, ‘नभए अरु ठाउँमा त भन्न सकिन्न तर तराई-मधेसमा झापादेखि कैलाली कञ्चनपुरसम्म स्थानीय निर्वाचनमा हामी अवरोध गर्नेछौँ।’

जनमत पार्टी निर्वाचन विरोधी नभएको पनि उनले बताए । राउतले भने, ‘हामी निर्वाचनमा जान आतुर छौँ । निर्वाचनमा जानु अगाडि सरकारले कमसेकम किसान आन्दोलनको माग सम्बोधन गर्ने पहल थालिएको देखिनु पर्‍यो। किनकि एकैदिनमा यो समस्या समाधान हुने होइन ।’

‘यो निर्वाचनबाट कुनै ठूलो उथलपुथल होला भन्ने छैन । अहिलेसम्म त्यही ३/४ जना नेताको अनुहार आउने हो । जुनसुकै सरकार आए पनि एजेन्डा यही रहने हो । त्यसैले यो सरकारले सम्बोधन प्रक्रिया वा तत्परता देखाएको भए हुन्थ्यो,’ राउतले भने, ‘किसान आन्दोलनको ज्ञापन पत्र नलिने, तर विदेशीको स्वार्थको पछाडि हाम्रा नेताहरु दौडिरहेका छन् ।’

फागुन १ गतेबाटअर्को चरणको किसान आन्दोलन हुने उनले बताए । मौसमको खराबीले राजमार्ग केन्द्रित आन्दोलनलाई ग्रामीण क्षेत्रमा सारिएको बताउँदै उनले फागुनबाट सशक्त कार्यक्रम आउने बताए ।

कृषिमन्त्री मधेसकै भए पनि किसानको माग सुन्नसमेत नचाहेको राउतले आरोप लगाए । किसानहरूका समस्याको दीर्घकालीन समाधानका लागि कानुन नै बनाउनुपर्ने भएकाले आफूहरूको माग सङ्घीय सरकारसँग रहेको राउतले बताए ।

प्रकाशित मिति: बुधबार, माघ २६, २०७८

प्रतिक्रिया दिनुहोस्