दुई दशकपछि जयनन्द लामाको नयाँ लोकगीत ‘महाभार लेकको जङ्गलमा’

कला-साहित्य

गृहपृष्ठ
कला-साहित्य

दुई दशकपछि जयनन्द लामाको नयाँ लोकगीत ‘महाभार लेकको जङ्गलमा’

समाचारदाता बुधबार, माघ २६, २०७८

लोकगायक जयनन्द लामाले दुई दशक लामो अन्तरालपछि मौलिक लोकगीत ‘महाभार लेकको जङ्गलमा याला’ दर्शकमाझ ल्याएका छन् । उनले आफ्नै युट्यबमार्फत गीत सार्वजनिक गरेका हुन् ।

गायक लामाकै शब्द र सङ्गीत रहेको लोकगीतमा दीपा लामा, बाबु जिम्बा, आरबी लामा, दाबा फिन्जो तामाङ, शशीकला मोक्तान र अञ्जु थोकरको पनि स्वर सुन्न सकिन्छ । गीतमा सङ्गीत संयोजन छेवाङ तेन्जिङ लामा र मिक्सिङ कारसाङ लामाको छ ।

ल्होसारको अवसर पारेर सार्वजनिक गरिएको गीतको भिडियोमा कलात्मक र सांस्कृतिक नृत्य प्रस्तुत गरिएको छ । इन्द्र गुरुङद्वारा निर्देशित म्युजिक भिडियोमा गायक जयनन्द लामाका साथमा डोमा ह्योल्मो, दाब फिन्जो तामाङ, बाबु जिम्बा, श्याममाया गुरुङ, सकु तामाङसमेतको अभिनय छ ।

सेवा फिल्म्स्को दृश्य निर्माण र सुरेन्द्र थिङको निर्माणमा बनेको म्युजिक भिडियोको छायाङ्कन मरुभूमि नारायण र सम्पादन बाबु जिम्बाले गरेका छन् ।

गायक लामाले आफूले झन्डै ४० वर्षअघि सङ्कलन गरेको गीत अहिले गाएको बताए । ‘यो पहाडी र हिमाली शृङ्खलाको बीचमा बस्ने सम्पूर्ण नेपालीको पूरानो र मौलिक परम्परागत गीत हो’, जयनन्दले भने, ‘यो कुनै जात विशेषको गीत नभई ती भेकमा हरेक चाडपर्वमा पुर्खादेखि अहिलेसम्म पनि नाच्दै गाइने गीत हो ।’

पाँच दशकअघि गायन यात्रा सुरू गरेका लामाले लोकगीत, दोहोरीगीत, गीति नाटक गरी दुई सयभन्दा बढी गीत गाएका छन् । गायक लामा पछिल्लो समयमा चलचित्रहरूमा अभिनयमा व्यस्त छन् ।

प्रकाशित मिति: बुधबार, माघ २६, २०७८

प्रतिक्रिया दिनुहोस्