बाक्लो हिमपातले राजमार्ग अवरुद्ध, जनजीवन कष्टकर बन्दै

मुख्य समाचार

गृहपृष्ठ
मुख्य समाचार

बाक्लो हिमपातले राजमार्ग अवरुद्ध, जनजीवन कष्टकर बन्दै

समाचारदाता शुक्रबार, माघ २१, २०७८

बिहीबार रातिदेखि भएको हिमपातले सुदूरपश्चिम प्रदेशका सात पहाडी जिल्ला जोड्ने भीमदत्त राजमार्ग अवरुद्ध भएको छ । गए रातिदेखि लगातार बाक्लो हिमपात हुँदा राजमार्ग अवरुद्ध भएको इलाका प्रहरी कार्यालय बुडरले जनाएको छ ।

राजमार्गमा परेको हिउँ हटाउने प्रयास भइरहेको बताइएको छ । राजमार्ग अवरुद्ध भएपछि दजनौँ सवारीसाधन तथा यात्रु यहाँको गैरा तथा बुडर बजारमा रोकिएका छन् ।

उक्त राजमार्गअन्तर्गतको साहुखर्क, गैरा, हगुल्टे क्षेत्रमा निकै बाक्लो हिमपात भएको छ ।

यसैगरी डोटीको सिलगढी तथा अछामको साफे जोड्ने पहलमानसिंह स्वाँर राजमार्ग पनि हिमपातका कारण अवरुद्ध भएको छ । उक्त राजमार्गअन्तर्गत डोटीको चौखुट्टैमा बाक्लो हिमपात हुँदा बाजुरा, अछामबाट तराई जान हिँडेका तथा तराईबाट पहाड जान हिँडेका सवारी तथा यात्रु बीचबाटोमै अलपत्र परेका छन् ।

जनजीवन कष्टकर

गए रातिदेखि डोटीका विभिन्न क्षेत्रमा बाक्लो हिमपातका कारण चिसो बढेपछि जनजीवन कष्टकर बनेको छ । बाक्लो हिमपातकाले गर्दा मानिसहरू घरबाहिर निस्किन सकिरहेका छैनन् ।

यहाँका खप्तड, गोलादेउ, नापानी, चर्केकोलेक, बडिकेदारथान, अल्याडी, चौरीबाज, ओखरखाली, मुस्ताल, देउताल, शिखरगाथ क्षेत्रमा बिहीबारदेखि हिमपात भइरहेको छ । यस क्षेत्रमा केही हप्ता पहिले परेको हिउँ पग्लिन नपाउँदै फेरि हिउँ परेपछि चिसो बढेको हो । पानीका मुहानदेखि रुखहरुमा समेत बाक्लो हिउँ जमेकाले गाईवस्तुलाई घाँस काट्न र मानिसलाई पानी खानसमेत समस्या भएको बडिकेदार गाउँपालिका–२ का भरत बोहराले जानकारी दिए ।

यसैगरी रुकुमपूर्वको माथिल्लो क्षेत्रमा पुनः हिमपात भएको छ । जिल्लाको हिमाली र उच्च लेकाली क्षेत्रमा हिमपातका कारण चिसो निकै बढेको छ ।

पटक–पटक भएको हिमपातका कारण मानिससँगसँगै पशुचौपायलाई पनि समस्या भएको छ । जिल्लाको पुथाउत्तरगङ्गा गाउँपालिकाको अधिकांश क्षेत्र तथा सिस्ने र भूमे गाउँपालिकाको माथिल्लो क्षेत्रमा बिहीबारदेखि हिमपात भएको छ । यसअघि परेको हिउँ पग्लिन नपाउँदै फेरि हिउँ थपिएपछि चिसो निकै बढेर दैनिकी कष्टकर बनेको पुथाउत्तरगङ्गा गाउँपालिका–१ मैकोटका तेजकुमार गुरुङले बताए ।

यस्तै हिउँले जमिन ढाक्दा पशुचौपायलाई चरन क्षेत्रको अभाव खड्किएको मैकोटमा अर्का स्थानीय विकास पुनले बताए । पहिले भण्डारण गरी राखेको घाँसपात सकिएकाले अहिले पशुचौपायलाई के खुवाउने भन्ने समस्या किसानलाई परेको उनले बताए । रुकुमपूर्वमा यस वर्ष सातौँ पटकसम्म हिमपात भइसकेको छ ।

यसैगरी गए रातिदेखिको वर्षा र हिमपातले त्रिभुवन राजपथ पनि अवरुद्ध भएको छ । सिमभञ्ज्ङ र अघोरमा बाक्लो हिउँ पर्नाले आज बिहान २ बजेदेखि हेटौँडा काठमाडौँतर्फको यातायात अवरुद्ध भएको पालुङ इलाका प्रहरी कार्यालयले जनाएको छ ।

बिहीबार राति परेको हिउँ करिब छ इन्च बाक्लो भएको र पानी परिररहेकाले मौसममा सुधार नआएसम्म हिउँ पन्छाउन कठिनाइ उत्पन भएको थाहा नगरपालिकाका प्रमुख लवशेर विष्ट बताए ।

प्रकाशित मिति: शुक्रबार, माघ २१, २०७८

प्रतिक्रिया दिनुहोस्