बागलुङमा निषेध आदेशमा थप कडाइ, अत्यावश्यकबाहेकका सबै सेवा बन्द

मुख्य समाचार

गृहपृष्ठ
मुख्य समाचार

बागलुङमा निषेध आदेशमा थप कडाइ, अत्यावश्यकबाहेकका सबै सेवा बन्द

बिहीबार, साउन २८, २०७८

बागलुङमाअत्यावश्यकबाहेकका सबै सेवा बन्द हुने गरी निषेध आदेश थप गरिएको छ। आज बिहान ५ बजेदेखि निषेध आदेशमा कडाइ गरिएको हो । यो आदेश आगामी भदौ ५ गते मध्यरातसम्म लागू रहने छ । यसअघि गत मङ्गलबार जिल्ला कोभिड–१९ सङ्कट व्यवस्थापन केन्द्रको बैठकले कोरोना सङ्क्रमणदर बढेको निष्कर्षसहित थप कडाइ गर्ने निर्णय गरेको थियो ।

केन्द्रका संयोजक एवं निमित्त प्रमुख जिल्ला अधिकारी गणेश गौतमद्वारा जारी निषेध आदेश अनुसार सबै खाले सार्वजनिक तथा निजी यातायात बन्द भएका छन् । बजार, व्यवसाय, बैंक तथा वित्तीय संस्था, सरकारी/गैरसरकारी कार्यालय सञ्चालनमा पनि रोक लगाइएको छ । खाद्यान्न र पशुपन्छीका पसल हरेक आइतबार, बुधबार र शुक्रबार मात्र सञ्चालन हुनेछन् । यस्तै तरकारी, फलफूल, दूध, मासु, पानीलगायत अत्यावश्यक सेवाका पसल स्वास्थ्य मापदण्डको पालना गरेर दैनिक बिहान १० बजेसम्म मात्र खोल्न पाइने छ । विवाहलगायत संस्कारजन्य कार्यमा पनि एक पक्षबाट जम्मा सात जना मात्र सहभागी भएर घरमै गर्नुपर्ने गरी तोकिएको छ । काम नपरी घरबाहिर ननिस्कन र भीडभाडजन्य कुनै पनि क्रियाकलाप नगर्न स्थानीय प्रशासनले सबैमा आग्रह गरेको छ ।

त्रिभुवन विश्वविद्यालय, लोकसेवा आयोग र व्यावसायिक तालिम परिषद्‌बाट सञ्चालन हुने पूर्वनिर्धारित परीक्षा भने सञ्चालन हुने जनाइएको छ । कोभिड–१९ विरुद्धको खोप अभियान यो अवधिमा पनि जारी रहने छ । एम्बुलेन्स, दमकल, शववाहनलगायत अत्यावश्यक सेवामा प्रयोग भएका सवारी साधन सञ्चालनमा भने कुनै अवरोध छैन ।

यस्तै सदरमुकामदेखि जिल्लाका विभिन्न भेगमा हुने खाद्यान्नको ढुवानीका लागि आइतबार, बुधबार र शुक्रबार सवारी साधन चलाउन दिइने भएको छ । बागलुङ भएर अन्य जिल्लामा जाने सवारी साधनले भने जिल्लाभित्र यात्रु चढाउन र ओराल्नसमेत नपाउने भएका छन् ।

बागलुङमा दोस्रो चरणको महामारी भित्रिएपछि गत वैशाख तेस्रो सातादेखि निषेध आदेश जारी छ । बीचमा सङ्क्रमणदर केही घटेपछि निषेधलाई खुकुलो पारिएकोमा पुनः सङ्क्रमण बढेसँगै कडा पारिएको हो । स्वास्थ्य कार्यालयका अनुसार हाल जिल्लामा सक्रिय सङ्क्रमितको सङ्ख्या ६४८ छ । बागलुङमा कोरोना सङ्क्रमणबाट हालसम्म ६३ जनाको मृत्यु भएको छ। (रासस)

प्रकाशित मिति: बिहीबार, साउन २८, २०७८

प्रतिक्रिया दिनुहोस्