गण्डकीमा राप्रपा निर्देशनको अवज्ञा

राजनीति

गृहपृष्ठ
राजनीति

गण्डकीमा राप्रपा निर्देशनको अवज्ञा

समाचारदाता बुधबार, माघ १२, २०७८

राष्ट्रिय सभा सदस्य निर्वाचनमा आफ्नो पार्टीको उम्मेदवार नरहेको प्रदेशमा मतदान नगर्ने पार्टीको निर्देशन विपरीत म्याग्दी बेनी नगरपालिकाकी उपमेयर सन्जु बरुवालले मतदान गरिन् । राप्रपाले चुनावको अघिल्लो दिन सूचना जारी गरेरै मतदानमा सहभागी नहुन निर्देशन गरेको थियो ।

सन्जु मङ्गलबार नै मतदानका लागि पोखरा पुगेकी हुन् । ‘मलाई सूचना आएको थिएन । मतदान नगर्ने कुरा थाहा पनि छैन,’ उनले भनिन्, ‘मैले मतदान गरेँ । पार्टीले कारबाही गरे पनि भोग्ने होला अब ।’

राप्रपाबाटै निर्वाचित भएका बागलुङ नगरपालिकाका उपमेयर सुरेन्द्र खड्का भने मतदानमा सहभागी भएनन् ।

गण्डकी प्रदेशमा कुल २२९ मतदातामध्ये दुई जनाले मतदान गरेनन् । एकजना राप्रपाका खड्का हुन् भने अर्का हुन् मुस्ताङको लो घेकर दामोदर कुण्ड गाउँपालिकाका अध्यक्ष लोप्साङ छोम्पेल विष्ट हुन् ।

उनी हाल अमेरिकामा रहेको परिवार स्रोतले जनाएको छ । विष्ट यसअघिको राष्ट्रियसभा निर्वाचनमा पनि सहभागी थिएनन् । विष्ट स्वतन्त्र चुनाव जितेर एमाले छिरेका थिए ।

गण्डकीमा सत्ता गठबन्धन निकै बलियो छ । गठबन्धनको ३ हजार ३०० मतभार छ भने एक्लै लडेको एमालेको २ हजार ५५६ मतभार छ ।

राष्ट्रिय सभा निर्वाचनअन्तर्गत गण्डकीमा तीन पदका लागि ६ जना उम्मेदवार छन् । कांग्रेसले नेतृत्व गरेको सत्ता गठबन्धनबाट महिला कोटामा कांग्रेस नेतृ कमला पन्त, खुलामा माओवादीका सुरेश आले मगर र दलितमा माओवादीकै भुवन सुनार उम्मेदवार छन् । एमालेबाट भने महिलामा लीला थनेत, खुलामा पुण्य पौडेल र दलितमा अर्जुनकुमार सुनाम उम्मेदवार छन् ।

आउँदो फागुन २० गते गण्डकीमा दिनानाथ शर्मा, खिमबहादुर विक र शान्तिकुमारी अधिकारीको पद रिक्त हुन लागेको हो ।

प्रकाशित मिति: बुधबार, माघ १२, २०७८

प्रतिक्रिया दिनुहोस्