तीनै तहको निर्वाचन एकैपटक गर्न वातावरण बनाउने माओवादी केन्द्रको निर्णय

राजनीति

गृहपृष्ठ
राजनीति

तीनै तहको निर्वाचन एकैपटक गर्न वातावरण बनाउने माओवादी केन्द्रको निर्णय

समाचारदाता शनिबार, माघ ८, २०७८

नेकपा (माओवादी)केन्द्रले तीनै तहको निर्वाचन एकैपटक गर्न वातावरण बनाउने निर्णय गरेको छ ।

शनिबार केन्द्रीय कार्यालय पेरिसडाँडामा बसेको निवर्तमान स्थायी कमिटी सदस्य तथा आयोगका अध्यक्षहरुको बैठकले स्थानीय तह, प्रदेश र सङ्घीय निर्वाचन एकैपटक गर्नका लागि आवश्यक परामर्श गरेर वातावरण बनाउने निर्णय गरेको हो ।

आर्थिक मितव्ययिताका लागि तीनै तहको निर्वाचन एकैपटक गर्नुपर्ने आफ्नो पार्टीको धारणा रहेको र यसमा आवश्यक परामर्श गरिने पार्टी प्रवक्ता कृष्णबहादुर महराले बताए ।

‘तीनवटै तहको चुनाव सकेसम्म कम खर्चमा एकैपटक कसरी गर्न सकिन्छ भनेर छलफल गर्ने भन्ने भएको छ । निर्वाचन आयोग, पत्रकार, बुद्धिजीवीहरूको राय अनुसार कानुनविद्सँग छलफल गरेर निष्कर्षमा पुगिने छ,’ उनले भने ।

यसअघि माओवादी अध्यक्ष प्रचण्डले सत्ता गठबन्धनको बैठकमा वैशाखमा संसदीय चुनाव गरेर संविधानको धारा २२५ प्रयोग गरी स्थानीय तहको चुनाव ६ महिनापछि अर्थात् मङ्सिरमा गर्नुपर्ने प्रस्ताव राखेका थिए ।

तर शुक्रबारको गठबन्धनको बैठकमा भने उनको प्रस्तावमा छलफल भएन । आगामी निर्वाचनहरू गर्ने सम्बन्धमा कानुनविद्सँग परामर्श लिने निर्णय भएको थियो ।

यस्तै माओवादी बैठकले कोरोनाको ओमिक्रोन भेरियन्ट नियन्त्रणमा नआएसम्म तत्काल जनपरिचालनको जिम्मेवारी पार्टी अध्यक्षलाई दिएको छ । साथै बाँकी रहेका सङ्गठनात्मक कामहरू टुङ्ग्याउने जिम्मा पनि पार्टी अध्यक्ष प्रचण्डलाई नै दिने निर्णय भएको प्रवक्ता महराले जानकारी दिए ।

उनकाअनुसार बैठकले अमेरिकी सहायता परियोजना एमसीसी सम्झौतामाथि अध्ययन गरी सुझाव दिन पार्टीको आन्तरिक कार्यदल गठन गरेको छ । यसअघि सत्ता गठबन्धनले झलनाथ खनालको नेतृत्वमा कार्यदल गठन गरिसकेको छ ।

प्रकाशित मिति: शनिबार, माघ ८, २०७८

प्रतिक्रिया दिनुहोस्