विसं २०७९ का लागि १४ पात्रोलाई स्वीकृति, पात्रोहरू माघ १५ देखि बजारमा आउने

समाचार

गृहपृष्ठ
समाचार

विसं २०७९ का लागि १४ पात्रोलाई स्वीकृति, पात्रोहरू माघ १५ देखि बजारमा आउने

समाचारदाता मंगलबार, माघ ४, २०७८

नेपाल पञ्चाङ्ग निर्णायक समितिले वि.सं. २०७९ का लागि १४ वटा पात्रो (पञ्चाङ्ग) लाई स्वीकृति दिने निर्णय गरेको छ ।

आगामी वर्षका लागि तोयनाथ पन्तको, बाबुराम, नरनाथ, हिमाल, अठोला, तारकेश्वर, सूर्य, आकाश दर्शन, बगलामुखी, शुभ, बाबा गोरखनाथ, कीर्ति, सिद्धि र खप्तड तारानाथ पञ्चाङ्ग गरी १४ पात्रो (पञ्चाङ्ग) लाई स्वीकृति दिने निर्णय गरिएको समितिका सदस्यसचिव सूर्यप्रसाद ढुङ्गेलले जानकारी दिए ।

समितिबाट स्वीकृति पाएका पात्रो यही माघ १५ गतेदेखि बजारमा आउनेछन् । वि.सं. २०७६ सम्म पुस अन्तिम साता नै पात्रो (पञ्चाङ्ग) प्रकाशन भइसक्थ्यो । गत वर्षदेखि कोरोना महामारीले गर्दा पञ्चाङ्गकार जम्मा भएर रुजु गर्ने काममा अप्ठेरो परेकाले काममा ढिलाइ हुँदा पञ्चाङ्ग प्रकाशनमा केही ढिला हुन थालेको हो ।

पञ्चाङ्ग निर्णायक समितिले स्वीकृति दिएका पात्रो मात्र प्रयोग गर्न आम मानिसलाई सूचना प्रकाशन गरी आह्वान गरिएको छ ।

पात्रोमा राखिने तिथि, बार, योग, नक्षत्र र करण गरी पाँच समूहलाई पञ्चाङ्ग भनिन्छ । पछिल्लो समय सामान्य मानिसले पनि बुझून् भनी घडीपलालाई बजेमा रुपान्तरण गरेरसमेत पात्रोमा राखिने गरेको छ ।

भित्तेपात्रोलाई व्यवस्थित गर्न स्वीकृति लिन आउनु भनी समितिले सूचना प्रकाशन गरेको भएपनि भित्तेपात्रो प्रकाशन गर्नेहरुले समितिसँग समन्वय नगरेको समितिले जनाएको छ । सूचना तथा प्रसारण विभागले मात्र समितिको स्वीकृतिमा भित्तेपात्रो प्रकाशन गर्ने गरेको समितिका अध्यक्ष श्रीकृष्ण अधिकारीले जानकारी दिए ।

अन्य भित्तेपात्रोहरू विभाग र समितिले स्वीकृति दिएका पात्रो (पञ्चाङ्ग) सारेर प्रकाशन हुने गरेकाले प्रतिलिपि अधिकारसम्बन्धी कानुनअनुसार कारबाही प्रक्रिया अघि बढाउने विषयमा पनि छलफल सुरु भएको समितिले जनाएको छ ।

प्रकाशित मिति: मंगलबार, माघ ४, २०७८

प्रतिक्रिया दिनुहोस्