कोभिडविरुद्ध खोपको बुस्टर मात्रा लगाउन शुरु

स्वास्थ्य

गृहपृष्ठ
स्वास्थ्य

कोभिडविरुद्ध खोपको बुस्टर मात्रा लगाउन शुरु

समाचारदाता आइतबार, माघ २, २०७८

कोरोनाविरुद्ध दुई मात्रा खोप लगाइसकेकाहरुलाई तेस्रो मात्रा (बुस्टर मात्रा) आजदेखि लगाइँदैछ । अग्रपंक्तिमा खटिनेहरुलाई आज माघ २ गतेदेखि र ६० वर्षमाथिका ज्येष्ठ नागरिकलाई माघ १४ गतेदेखि बुस्टर मात्रा लगाउन स्वास्थ्य तथा जनसंख्या मन्त्रालयले प्रदेशका स्वास्थ्य निर्देशनालय र जिल्ला स्वास्थ्य कार्यालयहरुलाई निर्देशन दिएबमोजिम तेस्रो मात्रा लगाउन शुरु गरिँदैछ ।

पहिलो चरणमा आजदेखि स्वास्थ्यकर्मी र कर्मचारी, सबै सुरक्षाकर्मी, सञ्चारकर्मी, सार्वजनिक फोहर संकलक, सरसफाइकर्मी, एम्बुलेन्सचालक तथा शववाहन चालक, महिला स्वास्थ्य स्वयंसेविका, त्रिभुवन अन्तर्राष्ट्रिय विमानस्थलमा खटिने कर्मचारीहरुलाई बुस्टर मात्रा लगाइनेछ ।

सरकारी कार्यालय, सामुदायिक सेवा प्रवाह गर्ने संघ संस्था, बैंकिङ सेवा, सार्वजनिक यातायातका चालक तथा सहचालकलाई पनि आजैदेखि बुस्टर डोज दिइने स्वास्थ्य मन्त्रालयले जनाएको छ ।

यही १४ गतेदेखि ६० वर्षमाथिका जेष्ठ नागरिक र रोग प्रतिरोधात्मक क्षमता कम भएकाहरुलाई बुस्टर डोज दिने कार्यक्रम छ । क्यान्सरका बिरामी, अंग प्रत्यारोपण गरेका बिरामी, एचआईभी भएका बिरामी, उपचारका क्रममा रोग प्रतिरोधात्मक क्षमता कम गराउने औषधि सेवन गरेका बिरामीहरुलाई दोस्रो चरणमा बुस्टर मात्रा दिइने छ ।

पूर्णमात्रा खोप लगाएको ६ महिना पूरा भएकाहरुले मात्रै बुस्टर मात्रा खोप लगाउन पाउनेछन् । जुन खोप यसअघि पहिलो र दोस्रो मात्रा लगाइएको थियो, सोही खोप बुस्टर मात्रामा दिइँदैछ । यसअघि खोप लगाएको कार्ड देखाएर खोप लगाउन पाइनेछ ।

प्रकाशित मिति: आइतबार, माघ २, २०७८