कोभिड विरुद्धको खोपको तेस्रो मात्रा माघको पहिलो साताबाट

स्वास्थ्य

गृहपृष्ठ
स्वास्थ्य

कोभिड विरुद्धको खोपको तेस्रो मात्रा माघको पहिलो साताबाट अग्र पङ्क्तिका स्वास्थ्यकर्मी, वृद्धवृद्धा, रोग प्रतिरोध क्षमता गुमाएका व्यक्ति र दीर्घरोगीहरू प्राथमिकतामा

समाचारदाता शनिबार, पुस २४, २०७८

स्वास्थ्य तथा जनसङ्ख्या मन्त्रालयले अग्रपङ्क्ति काम गर्ने र ६० वर्षभन्दा माथिका ज्येष्ठ नागरिकलाई कोभिड–१९ विरुद्धको थप एक अतिरिक्त (तेस्रो) मात्रा खोप दिने भएको छ । कोभिड–१९ खोप सल्लाहकार समितिको सिफारिसमा मन्त्रालयले थप एक मात्रा खोप दिन लागेको हो ।

माघको पहिलो हप्ताबाट अग्रपङ्क्तिमा काम गर्ने चिकित्सक, स्वास्थ्यकर्मी, सुरक्षाकर्मीलाई र माघको दोस्रो हप्ताबाट रोग प्रतिरोधात्मक क्षमतामा कम भएका तथा ६० वर्षमाथिका सबैलाई अतिरिक्त थप एक मात्राको खोप लगाउने भएको मन्त्रालयका सचिव डा. रोशन पोखरेलले जानकारी दिए ।

सम्भावित कोरोना भाइरसको तेस्रो लहरलाई दृष्टिगत गर्दै कोरोना भाइरसको थप एक मात्रा (तेस्रो मात्रा) खोप दिइने भएको उनले बताए ।

कोभिड–१९ विरुद्धको पूर्ण खोप लगाएको तीन महिना पुगेका अग्रपङ्क्तिमा रहेका चिकित्सक, स्वास्थ्यकर्मी, सुरक्षाकर्मी, स्वास्थ्यसंस्थामा काम गर्ने कर्मचारी, सरकारी निकायमा काम गर्ने कर्मचारीलाई खोपको अतिरिक्त एक मात्रा खोप लगाइनेछ ।

यस्तै कोभिड–१९ विरुद्धको पूर्ण मात्रा खोप लगाएको ३ महिना पुगेका ६० वर्षभन्दा माथिका ज्येष्ठ नागरिकको साथै मध्यम तथा गम्भीर रूपमा रोग प्रतिरोधात्मक क्षमता कम भएका व्यक्ति सक्रिय क्यान्सरका रोगी, अङ्ग प्रत्यारोपण गरेका बिरामी, एचआइभी भएका बिरामी, उपचारका क्रममा रोग प्रतिरोधात्मक क्षमता कम गराउने औषधि सेवन गरिरहेका बिरामीलाई पनि अतिरिक्त मात्रा खोप दिइने मन्त्रालयले जनाएको छ ।

यसअघि गम्भीर प्रकृतिका रोग भएका बिरामी र रोग प्रतिरोधात्मक क्षमता कम भएका मानिसलाई अतिरिक्त मात्रा खोप एक दिन मात्र (यही पुस २० गते) लगाएर स्थगित गरिएको थियो । मन्त्रालयले सबै नागरिकलाई कोभिड–१९ विरुद्धको पूरा मात्रा खोप लगाएपछि मात्र अतिरिक्त खोप दिने निर्णय गरेपछि एक दिन लगाएर स्थगित गरेको थियो ।

अहिले सरकारसँग एक करोड दुई लाख मात्रा खोप रहेको छ ।

नेपालमा अहिले कुल परीक्षण गराएकामध्ये ८.४९ प्रतिशतमा कोभिड–१९ सङ्क्रमण देखिएको छ । हिजो मात्र १४ हजार ९७१ जनामा परीक्षण गर्दा ९६८ जनामा सङ्क्रमण देखिएको थियो । यसैगरी हिजै २४ जनामा कोरोना भाइरसको ओमिक्रोन भेरियन्ट पुष्टि भएको थियो ।

प्रकाशित मिति: शनिबार, पुस २४, २०७८

प्रतिक्रिया दिनुहोस्