सात लाखमा हेलिकोप्टर मगाएर बिरामीको उद्धार

मुख्य समाचार

गृहपृष्ठ
मुख्य समाचार

सात लाखमा हेलिकोप्टर मगाएर बिरामीको उद्धार

रासस मंगलबार, पुस २०, २०७८

सिमकोट, पुस २० । केही दिन अगाडिदेखि नाक र कानसम्बन्धी समस्याले थला परेका दुई बिरामीको सोमबार हेलिकोप्टरमार्फत उद्धार गरिएको छ । हुम्लाको उत्तरी नाम्खा गाउँपालिका–४ का ५० वर्षीय लामु तामाङ र २५ वर्षीय पाल्जोर तामाङको उद्धार गरिएको हो ।

उत्तरी क्षेत्रमा बाक्लो हिमपात हुनुका साथै गाउँमा उपचार सम्भव नभएपछि निजी खर्चमा काठमाडौँबाट हेलिकोप्टर मगाएर थप उपचारका लागि काठमाडौँ लगिएको आफन्त रेछिङबहादुर लामाले बताए ।

उनले भने, “आफ्नै निजी खर्चमा बिरामीको उद्धार गरेका हौँ, रु सात लाख ५० हजार महङ्गो हवाई भाडा तिरेर उपचारका लागि काठमाडौँ लगिएको छ । गाउँघरमा उपचार सम्भव नहुने भएपछि थप उपचारका लागि काठमाडौँ लगिएको हो ।”

समिट एरलाइन्सको फिस्टेल हेलिकोप्टरबाट उनीहरूलाई उद्धार गरिएको हो । पचास वर्षीय तामाङको नाकबाट आइतबार रातिदेखि निरन्तर रगत बगिरहेको र कसैगरे नरोकिएकोले उपचारका लागि हेलकोप्टर मगाएर काठमाडौँ लगिएको हो ।

पच्चीस वर्षीय लामालाई कानमा समस्या भएपछि थप उपचारका लागि काठमाडौँ लगिएको हो । बिरामीसँगै अन्य दुईजना कुरुवासमेत साथै गएको जानकारी प्राप्त भएको छ ।

उत्तरी हुम्लाका नागरिक बिरामी हुँदा आफ्नै खर्चमा महङ्गो हवाई भाडा तिरेर बिरामीलाई उपचार गराउन अन्यत्र लैजाने गरेका छन् । हिउँदयाममा यस क्षेत्रमा अत्यधिक चिसो हुनुका साथै स्वास्थ्यकर्मी कार्यालयमा नियमित नहुँदा सिधै काठमाडौँबाट हेलिकोप्टर मगाएर महङ्गो खर्चमा बिरामीले उपचार गर्नुपर्ने बाध्यता छ ।

यातायात सुविधा नहुँदा हुम्लीले बिरामी हुँदा हेलिकोप्टर र हवाईजहाजको भर पर्नुपर्ने अवस्था छ । बिरामी आफैँले हेलिकोप्टर रिजर्भ गर्दा रु सातदेखि १० लाखसम्म भाडा पर्ने गरेको छ ।

प्रकाशित मिति: मंगलबार, पुस २०, २०७८

प्रतिक्रिया दिनुहोस्