देशैभर पश्चिमी न्यूनचापीय प्रणाली सक्रिय, कतै वर्षा कतै हिमपात

मौसम

गृहपृष्ठ
मौसम

देशैभर पश्चिमी न्यूनचापीय प्रणाली सक्रिय, कतै वर्षा कतै हिमपात काठमाडौंको चन्द्रागिरि पनि सेताम्मे (फोटासहित)

समाचारदाता बुधबार, पुस १४, २०७८

तस्बिर साैजन्य : चन्द्रागिरिका पुजारी विदुर खनाल

पश्चिमी न्यून चापीय प्रणाली सक्रिय बनेसँगै देशभर वर्षा भएको छ । उच्च पहाडी र हिमाली भेगका साथै काठमाडौंका डाँडामा पनि हिउँ परेको छ । काठमाडौं उपत्यका वरपरका डाँडाहरू फूलचोकी, चन्द्रागिरि लगायतमा हिउँ परेको छ ।

बुधबार बिहान काठमाडौंमा १०.७ मिलिमिटर वर्षा भएको मौसम पूर्वानुमान महाशाखाले जानकारी दिएको छ । काठमाडौंमा मङ्गलबार वर्षा भएको थिएन ।

कीर्तिपुर ११.४ मिलिमिटर वर्षा मापन भएको छ । अहिले पनि काठमाडाैंमा सिमसिम वर्षा भइरहेकाे छ ।

कर्णालीका हिमाली जिल्ला मुगुसहित जुम्ला, हुम्ला, डोल्पामा हिमपात भएको छ । पुस पहिलाे साताबाट हिमपात सुरु भएकामा पश्चिमी न्यून चापीय प्रणाली सक्रिय भएसँगै मङ्गलबार रातिबाट ठूलो परिमाणमा हिमपात भइरहेकाे हाे ।

डोल्पाकाे सदरमुकाम दुनैमा हल्का हिमपात भए पनि उच्च क्षेत्रमा बाक्लो हिमपात भएको छ ।

मुगुमा याे वर्ष पहिलाे पटक हिमपात भएकाे छ । मुगुमा तापक्रम माइनस ३ डिग्रीमा झरेको छ । मुगुको छायानाथ रारा, सोरु र मुगुम कार्मारोङ् गाउँपालिकाका उच्च भेगमा बाक्लो हिमपात भएको स्थानीयले बताएका छन् । सदरमुकाम गमगढीमा भने वर्षाका साथै हल्का हिमपात भएको छ ।

महाशाखाको ताजा विवरण अनुसार दिपालयमा १२, डडेल्धुरामा १२.२ र धनगढीमा २ मिलिमिटर वर्षा भएको छ । त्यस्तै सुर्खेतको वीरेन्द्रनगरमा ५, नेपालगन्जमा २, जुम्लामा २.६ र घोराहीमा ०.६ मिलिमिटर वर्षा मापन भएको छ ।

पोखरामा ६.५, भैरहवामा १२.६, सिमरामा १३, ओखलढुंगामा ३ र ताप्लेजुङमा १२.३ मिलिमिटर वर्षा भएको छ । धनकुटा र जनकपुरमा क्रमशः २.८ र १.५ मिलिमिटर वर्षा भए पनि विराटनगरमा वर्षा मापन भएको छैन ।

महाशाखाका अनुसार आज दिउँसो पनि देशका धेरै स्थानमा वर्षा हुनेछ । बिहीबारबाट मात्र मौसममा सुधार आउने पूर्वानुमान मौसमविद्हरूको छ ।

हिमपातले सेताम्मे भएको काठमाडौंको चन्द्रागिरिका केही तस्बिरहरू --