बन्द सत्रमा ओलीले भने - एमालेका नीति नै राष्ट्रिय नीति हुन् - समाचारदाता :: Nepalitwa

मुख्य समाचार

गृहपृष्ठ
मुख्य समाचार

बन्द सत्रमा ओलीले भने - एमालेका नीति नै राष्ट्रिय नीति हुन्

समाचारदाता शनिबार, मंसिर ११, २०७८

एमालेको १०औं राष्ट्रिय महाधिवेशनअन्तर्गत जारी बन्द सत्रमा पार्टी अध्यक्ष के.पी. शर्मा ओलीले आफ्नो पार्टीका नीतिहरू नै राष्ट्रिय नीति भएको बताएका छन् । 'आज एमालेका नीति नै राष्ट्रिय नीति हुन्। पाँच दलीय गठबन्धनले लागू गरेन भने उसको गल्ती हो। गठबन्धनको सरकारले सन्तुलित कूटनीति कायम गरेन । यो पनि उसको गल्ती हो,' उनले भने ।

प्रतिक्रियावादी र तिनका पिछलग्गुको षडयन्त्रले दूरगामी असर पारेको ओलीले आरोप लगाए । 'हामी सुखी नेपाली, सम‌ृद्ध नेपालको अभियानमा छौं । समृद्धि सामाजिक समानता, सद्भाव, राष्ट्रिय एकताको पक्षमा रहेका शक्तिसँग एकता हुन्छ । यसविरुद्धका प्रतिक्रियावादी शक्तिसँग कठोर संघर्ष गर्छौं', ओलीले भने ।

एमाले अध्यक्ष ओलीले प्रतिकृयावादीको षड्यन्त्रका कारण आफ्नो पार्टी प्रतिपक्षमा पुगेको बताए । यही कारण देशमा यतिवेला गम्भीर चुनौती खडा भएको उनले बताए । ओलीले भने, ‘सत्ताबाट प्रतिपक्ष भएको अवस्थामा, विरोधीका जालझेल असंवैधानिक अलोकतान्त्रिक कदमले यहाँ पुग्यौं । जनताले यहाँ पुर्याएको होइन । जनमत यो होइन । अझ बढी गम्भीर चुनौती खडा भएको छ । राज्यको दुरूपयोग भएको छ । दृढ भएर सामना गर्नुपर्नेछ ।’

राज्य संयन्त्रको दुरुपयोग भइरहेको भन्दै उनले स्वतन्त्र न्यायालयको दुरुपयोग भएको बताए । शक्तिपृथक्कीकरणको सिद्धान्त खलबलिंदै गएको भन्दै यो क्रम अघि बढे लोकतन्त्रका लागि खतरा हुने उनले बताए ।

एमाले अध्यक्ष ओलीले पार्टीभित्र प्रतिस्पर्धा नभइ एकता गरेर अघि वढ्नुपर्ने बताएका छन् । उनले भने ‘विपक्षीसँग प्रतिस्पर्धा गरौं, पार्टीभित्र एकता गरौं ।’ एमालेबाट अन्य दलहरुले समेत सिक्न थालेको भन्दै ओलीले एमालैकै मोडलमा एकैपटक तल्ला तहका कमिटीहरुका अधिवेशन गर्न सुरु भएको बताए ।

उनले नवौं महाधिवेशनपछि संविधान निर्माण गरी जारी गर्न दलहरू एकजुट गराउन एमालेको महत्वपूर्ण भूमिका रहेको बताए । उनले महाधिवेशनपछि स्पष्ट वैचारिक दिशातर्फ अगाडि बढेको भन्दै एमालेलाई दुर्वचन बोल्ने र होच्याउने अवस्था अन्त्य भएको पनि बताए ।

प्रकाशित मिति: शनिबार, मंसिर ११, २०७८