काठमाडौंमा घामै नदेखिने गरी बाक्लो तुवाँलो, यो अवस्था अझै केही दिन रहन सक्ने

मौसम

गृहपृष्ठ
मौसम

काठमाडौंमा घामै नदेखिने गरी बाक्लो तुवाँलो, यो अवस्था अझै केही दिन रहन सक्ने

समाचारदाता शुक्रबार, मंसिर १०, २०७८

काठमाडौंमा केही दिनदेखि मौसम धमिलो हुँदै गएकोमा आज घाम नै कतै नदेखिने गरी बाक्लो तुवाँलो लागेको छ । स्थानीय वायुको प्रभावसँगै वायु प्रदूषणसमेतले गर्दा काठमाडौँ उपत्यकामा तुवाँलो लागेको विभागका मौसमविद् मञ्जु बासीले बताइन् ।

“अहिलेको अवस्थालाई हेर्दा मौसम तत्काल सफा हुने देखिएको छैन”, मौसमविद् बासीले भनिन् । उनका अनुसार मौसम सफा हुनका लागि वर्षा हुनुपर्छ वा तीव्र वेगले वायु चल्नुपर्छ । त्यस्तो अवस्था नदेखिएकाले तत्कालै मौसममा सुधार हुने सम्भावना नदेखिएको उनले बताइन् ।

पछिल्ला केही दिनयता नेपालमा देखिएको मौसमी प्रणालीको प्रभाव अझै केही दिन कायम रहने जल तथा मौसम विज्ञान विभागले जनाएको छ । विभागका अनुसार स्थानीय वायुको प्रभावले गर्दा देशको अधिकांश स्थानमा आंशिकदेखि सामान्य बदली रहेको छ ।

अहिले दिउँसो प्रदेश नं १, बागमती, गण्डकी र लुम्बिनी प्रदेशका पहाडी भूभागमा आंशिकदेखि सामान्य बदली रही प्रदेश नं १, बागमती, गण्डकी प्रदेशको उच्च पहाडी तथा हिमाली भूभागका एक-दुई स्थानमा हल्का हिमपातको सम्भावना रहेको मौसम पूर्वानुमान महाशाखाले जनाएको छ ।

भोलि प्रदेश नं १, वाग्मती, गण्डकी र लुम्बिनी प्रदेशको पहाडी भूभागमा आंशिकदेखि सामान्य बदली रही बाँकी भूभागमा मौसम सामान्यतया सफा भई प्रदेश नं १, वाग्मती र गण्डकी प्रदेशको उच्च पहाडी तथा हिमाली भूभागका एक-दुई स्थानमा हल्का हिमपातको सम्भावना रहेको छ ।

प्रकाशित मिति: शुक्रबार, मंसिर १०, २०७८

प्रतिक्रिया दिनुहोस्