यही मंसिर १० देखि १२ गतेसम्म चितवनमा गरिने नेकपा (एमाले)को १०औँ राष्ट्रिय महाधिवेशनको तयारी अन्तिम चरणमा पुगेको छ । महाधिवेशनको लागि मञ्च निर्माण, सुरक्षा व्यवस्था, प्रतिनिधिलाई खानपान तथा आवासको व्यवस्था र प्रचारप्रसारका काम धमाधम भइरहेका छन् ।
एमालेले १०औँ राष्ट्रिय महाधिवेशनकाे लोगोमा राखेको गैँडाको मूर्ति अर्थात् मस्कट पनि तयार भएको छ । एमालेले गैँडाको मस्कटसहितको लोगो २६ कात्तिकमा सार्वजनिक गरेको हो । लोगोमा मस्कटले कम्युनिष्ट पार्टीको झण्डा बोकेको छ ।
एमालेले साढे तीन लाख रुपैयाँ खर्चिएर गैँडाको मस्कट बनाउन लगाएको हो । चितवन एकसिंगे गैँडाका लागि पनि परिचित भएकाले महाधिवेशनको लोगोमा गैँडाको मस्कट राखिएको एमालेले जनाएको छ । मूर्तिकार सूर्य सहित १० जनाको टिमले १० दिन लगाएर गैँडाको मस्कट तयार गरेकाे हाे ।।
यसरी बनाइयो मस्कट
मूर्तिकारले विशेषगरी कास्टिङ र कार्बिङ गरेर दुई किसिमले मूर्ति बनाउँछन् । कार्बिङमा काठ र ढुंगामा मूर्ति बनाइन्छ भने कास्टिङमा चाँहि सिमेन्ट, फाइबर र धातुको प्रयोगबाट मूर्ति बनाइन्छ ।
गैँडाको मस्कट फाइबरबाट बनाइएको हो । पछिल्लो समय फाइबरबाट मूर्ति बनाउने प्रचलन बढ्दै गएको मूर्तिकार सूर्य बताउँछन् । फाइबरको प्रयोगबाट कम मूल्यमा छिटोछरितो मूर्ति बनाउन सकिने उनले बताए । उनका अनुसार फाइबर र रेजिन केमिकलको प्रयोगबाट गैँडाको मस्कट बनाइएको हो ।
यो मूर्ति बनाउनुअघि सुरुमा माटोको नमूना मूर्ति बनाइयो । ‘माटोबाट बनाइने मूर्तिमा डिटेल वर्क गर्छाैँ, कलाकारिताको काम यसमा हुन्छ । त्यसपछि अर्काे आउँछ, मोल्ड मोडलिङ । त्यसमा हामीले प्लाष्टरको डाइ बनाऔँ । त्यसपछि डाइका टुक्रा जोडेर फाइबर र रेजिन मिलाएर राखेपछि अन्तिम रुप तयार भयो,' उनले भने ।
तेस्रो चरणमा मात्रै प्रदर्शनमा राख्न मिल्ने मूर्ति तयार भएको उनले बताए । जनावर र मानिसको शरीरजस्तो देखिनेगरी ‘मिक्स’ गरेर मूर्ति बनाइएकाले यसलाई मस्कट भनिएको उनको भनाइ छ ।
१० जना मूर्तिकारको टोलीले रातदिन काम गरी १० दिनमा उक्त मस्कट तयार पारेको उनले बताए । ‘दिनमा मात्रै गरेर सम्भवै थिएन । तीन वटा टोली बनाएर १०औँ दिनमा मूर्ति तयार गरियो,' उनले भने ।
मस्कट राख्नको लागि महाधिवेशन उद्घाटन स्थलमा बेस बनाउने काम भइरहेको छ ।
भरतपुर महानगरपालिका-९ गोन्द्राङका मूर्तिकार सूर्यले व्यावसायिक रूपमा मूर्ति बनाउन थालेको २० वर्ष भइसक्यो । तर उनले गैँडाको मस्कटको मूर्ति बनाएको यो पहिलो हो । विशेषगरी उनले गैँडालगायतका जंगली जनावर, बुद्ध र शहिदका मूर्ति बनाउने गरेका छन् ।
