अझै नियन्त्रण भएन कपिलवस्तुको हैजा, साढे दुई लाख डोज खोप खुवाइँदै

स्वास्थ्य

गृहपृष्ठ
स्वास्थ्य

अझै नियन्त्रण भएन कपिलवस्तुको हैजा, साढे दुई लाख डोज खोप खुवाइँदै

समाचारदाता सोमबार, कात्तिक २९, २०७८

कपिलवस्तुमा हैजा नियन्त्रणको लागि मंसिरको पहिलो सातादेखि खोप खुवाइने भएको छ । कपिलवस्तुका पाँच स्थानीय तहमा १८ असोजदेखि हैजा फैलिंदा ६ जनाको मृत्यु भइसकेको छ । हैजा क्रमशः घट्दै गएको भएपनि यसको जोखिम नियन्त्रण भइनसकेकाले स्वास्थ्य तथा जनसंख्या मन्त्रालय र विश्व स्वास्थ्य संगठन (डब्लुएचओ) बाट उपलब्ध ‘ओरल कलेरा भ्याक्सिन’ खुवाउने तयारी भएको हो ।

कृष्णनगर नगरपालिकामा असोज १८ गतेदेखि फैलिएको हैजा शिवराज नगरपालिका, महाराजगन्ज नगरपालिका, विजयनगर गाउँपालिका र यशोधरा गाउँपालिकासम्म पुगेको छ । यी स्थानका एक वर्षदेखि माथि उमेर समूहकालाई १४ दिनको फरकमा दुई पटक भ्याक्सिन खुवाइने स्वास्थ्य कार्यालय कपिलवस्तुका प्रमुख हेमराज पाण्डेले बताए । ५ मंसिरमा यशोधरा गाउँपालिकाबाट हैजाविरुद्धको खोप अभियान सुरू गर्ने तयारी भइरहेको छ । बाँकी चार पालिकामा ७ मंसिरदेखि खोप अभियान सञ्चालन हुनेछ ।

साढे दुई लाखलाई हैजाविरुद्धको खोप
विश्व स्वास्थ्य संगठनले पहिलो डोजको लागि दुई लाख ५२ हजार तीन सय ६३ भाइल खोप उपलब्ध गराउने भएको छ । खोप आइतबार काठमाडौं आइपुगेको छ । जिल्ला खोप समन्वय समितिको बैठक बसेर प्रभावित पालिकामा दिने कोटा समेत निर्धारण भइसकेको छ । कोटाअनुसार यशोधरा गाउँपालिकामा ३७ हजार ७ सय ८३, महाराजगन्ज नगरपालिकामा ५३ हजार १ सय ५६, कृष्णनगर नगरपालिकामा ६० हजार ७ सय ४३, शिवराज नगरपालिकामा ६४ हजार ७ सय ७८ र विजयनगर गाउँपालिकामा ३५ हजार ९ सय ३ डोज खोप वितरण हुने स्वास्थ्य कार्यालयका स्वास्थ्य सहायक उमेशचन्द्र घिमिरेले बताए ।

शिक्षक, महिला स्वास्थ्य स्वयंसेविका परिचालन गरी ६ दिनसम्म लगातार खोप अभियान सञ्चालन गर्ने समितिले निर्णय गरेको छ । हैजा प्रभावित शिवराज नगरपालिकाका नगरप्रमुख नेत्रराज अधिकारीका अनुसार खोप अभियानसँगै नियन्त्रणका अन्य उपायहरू पनि अघि बढाउने योजना बनाइएको छ ।

हैजाको उपचार गर्न अस्पताल जाने घटे
असोज १८ देखि आइतबार साँझ ६ बजेसम्म शिवराज अस्पताल बहादुरगन्जमा १ हजार ३ सय ७१ जना, बैदौली स्वास्थ्य चौकीमा ९० जना र शिवराज आधारभूत अस्पतालमा ६ जना उपचारको लागि भर्ना भएको जिल्ला स्वास्थ्य कार्यालयको तथ्यांक छ । सो कार्यालयका अनुसार हैजाबाट जिल्लाभरमा ६ जनाको मृत्यु भएको भएपनि अस्पतालमा भने अहिलेसम्म कसैको मृत्यु भएको छैन । हैजाको सिकायत लिएर तिहारपछि औसत ६ जना बिरामी दैनिक आउने गरेकामा हिजो आइतबार कुनै विरामी नआएको शिवराज अस्पतालका चिकित्सक मुकेश चौधरीले बताए ।

प्रकाशित मिति: सोमबार, कात्तिक २९, २०७८

प्रतिक्रिया दिनुहोस्