प्रदेश १ मा नेकपा एसका राजेन्द्र राई मुख्यमन्त्री बन्ने

मुख्य समाचार

गृहपृष्ठ
मुख्य समाचार

प्रदेश १ मा नेकपा एसका राजेन्द्र राई मुख्यमन्त्री बन्ने

समाचारदाता सोमबार, कात्तिक १५, २०७८

प्रदेश १ मा तिहारअघि नै राजेन्द्र राई मुख्यमन्त्री बन्ने भएका छन् । सोमबार बसेको प्रदेशसभाको बैठकमा मुख्यमन्त्री भीम आचार्यले राजीनामाको घोषणा गरेसँगै अब राजेन्द्र राई मुख्यमन्त्री बन्ने भएका हुन् ।

आचार्य नेकपा एमालेका हुन् भने राई नेकपा (एकीकृत समाजवादी)का हुन् । एमाले विभाजन भएसँगै आचार्य अल्पमतमा परेका थिए । अल्पमतमा परेपछि विश्वासको मत लिन आचार्यले प्रदेशसभामा प्रस्ताव पेस गरेका थिए ।

तर बहुमत नपुग्ने भएपछि सोमबार आचार्यले राजीनामाको घोषणा गरेका हुन् । उनले राजीनामा घोषणा गरेकाले विश्वासको प्रस्तावमाथि मतदानमा जानु नपर्ने भन्दै २३ कात्तिकसम्मका लागि प्रदेशसभाको बैठक स्थगित गरिएको सभामुख प्रदीपकुमार भण्डारीले बताए ।

मुख्यमन्त्री आचार्यले प्रदेश प्रमुखलाई राजीनामा बुझाउन जाने बताएका छन् । उनले राजीनामा दिएपछि प्रदेश प्रमुखले नयाँ मुख्यमन्त्री बनाउन दलहरूमा आह्वान गर्नेछन् ।
यसपछि प्रदेशसभामा बहुमत रहेको नेपाली कांग्रेस, माओवादी केन्द्र, नेकपा एस र जनता समाजवादीसमेतको गठबन्धनले राजेन्द्र राईको नाम सिफारिस तय भैसकेको छ ।

प्रदेशसभामा ९२ जना सांसद सासद छन् । सरकार बनाउन ४७ जना सांसद अवश्यक पर्छ । तर, एमालेको सभामुखसहित ४१ सांसद छन् । यता विपक्षी गठबन्धनमा आवद्ध दल कांग्रेसका २१, माओवादी केन्द्रका १५, नेकपा (एकीकृत समाजवादी)का १० र जनता समाजवादीका तीन जना गरी ४९ जना सांसद छन् । सरकार बनाउनका लागि यो बहुमत संख्या हो ।

यसैगरी प्रदेशसभामा संयुक्त लोकतान्त्रिक राष्ट्रिय मञ्च र राप्रपाका एक एक जना सांसद छन् ।

प्रकाशित मिति: सोमबार, कात्तिक १५, २०७८