के हाे पल र समीक्षा सम्बन्ध ? पालैपालाे दुवैले दिए स्पष्टीकरण

कला-साहित्य

गृहपृष्ठ
कला-साहित्य

के हाे पल र समीक्षा सम्बन्ध ? पालैपालाे दुवैले दिए स्पष्टीकरण

समाचारदाता सोमबार, कात्तिक ८, २०७८

काठमाडौं, ८ कात्तिक । नायक पल शाह र गायिका समीक्षा अधिकारी केही समययता चर्चामा छन् । उनीहरूबीचको प्रेम सम्बन्धबारे फिल्मनगरीमा चर्चा चल्न थालेपछि यी दुई केही समयदेखि मिडियासँग समेत तर्किरहेका छन् । दुईजनाको सम्बन्धलाई लिएर चर्चा चुलिनुका साथै मिडियाहरू पनि रङ्गिन थालेपछि समीक्षा र पल दुबैले सामाजिक सञ्जालमार्फत आफ्नो सम्बन्धबारे प्रष्ट्याएका छन् ।

पलले समीक्षासँग भएको सम्बन्धलाई मात्रै पेशागत सम्बन्ध भएको सामाजिक सञ्जालमार्फत स्पष्ट पारेका छन् । तर यसैलाई अन्तरङ्ग सम्बन्धजस्तो गरेर प्रचार प्रसार गरिएको भन्दै उनले यसबाट आफू दुःखि भएको बताएका छन् । 'काम गर्ने क्रममा व्यक्ति वा समूहसँग नजिक भइन्छ र सांगीतिक सहकार्य समीक्षासँग भएको हो' पल लेख्छन् ,'पछिल्लो केही दिनयता आएका खबरले मेरो शुभचिन्तकसँगै परिवारलाई समेत दु:खी बनाएको छ ।' समीक्षासँग रहेको मित्रतालाई अन्य नाम नदिन आग्रह गर्दै उनले चरित्र हत्या हुने गरी समाचार नबनाइदिन भनेका छन् ।

यस्तो छ पल शाहद्वारा सार्वजनिक गरिएको भनाइ

देश विदेशमा रहनुभएका सम्पूर्ण मेरा दर्शक स्रोताज्यूहरूमा हार्दिक सम्मान अनि धेरै माया। विगत केही दिनदेखि मेरो र गायिका समीक्षा अधिकारीको विषयमा आइरहेका समाचारबाट मलगायत मेरो परिवार अनि मलाई माया गर्नुहुने सिंगो दर्शकदीर्घ नै दुःखी बनेको महसुस हामीले गरेका छौ । जुनसुकै क्षेत्रमा काम गर्दा पनि केही व्यक्ति समूह कहीँ न कहीँ कुनै न कुनै प्रकारले नजिक हुने गर्छ, यो हामी सबैलाई थाहा भएकै कुरा हो। मेरो पेसा र विधाका कारण म धेरै मान्छेहरूसँग सहकार्य गर्नुपर्ने हुन्छ र मसँग जोडिनुहुने मेरा अग्रज, अनुज र सहकर्मीहरूमाझ मैले सदैव आफूलाई सहज र सहयोगी तवरले प्रस्तुत गरिरहेको हुन्छु। अरु कलाकारहरूसँग जस्तै र अरुले जस्तै सांगीतिक सहकार्य गायिका समीक्षा अधिकारीसँग पनि भएको कुरा यहाँहरूलाई विदितै छ। हुँदै नभएका, गर्दै नगरिएका, बिनाआधारका कुराहरूलाई गसिप बनाएर एउटा कालाकार र उसको व्यक्त्तिगत जीवनमाथ िआँच आउने किसिमले लेखिएका झुटा समाचारहरूले मलाई अत्यन्तै दुःखी बनाएको छ। यसरी कसैको व्यक्त्तिगत प्रतिष्ठा र चरित्र हत्या हुने गरी बदनाम गर्ने गरी समाचार नबनाइदिनुहुन सम्पूर्ण मिडियाकर्मीज्यूहरूलाई हार्दिक अनुरोध गर्दछु। मैले सधैं दर्शक स्रोता मेरो घर अनि मिडियालाई आफ्नो परिवार मानेको छु र सदैव मानिरहने छु। यही घर परिवारको माया, आशीर्वाद र शुभेच्छाको कारणले गर्दा नै म यहाँसम्म आइपुगेको छु। मैले जानेर नजानेर कसैको चित्त दुखाएको छु भने म यसै पोस्टमार्फत हार्दिक माफी माग्दछु। गायिका समीक्षा अधिकारी र मेरो बीचमा भएको मित्रता र सहकार्यलाई अन्य अन्य तथानम शीर्षक दिएर सिंगो पत्रकारितालाई पनि बदनाम गर्ने र हाम्रो चरित्रहत्या हुने कार्य नगरिदिनुहोला ।

यस्तै समीक्षाले पनि सामाजिक सञ्जालमार्फत नै आफ्नो भनाइ सार्वजनिक गरेकी छिन् । उनले पलसँग जोडिएर आएको समाचारहरू कपोकल्पित रहेको उल्लेख गरेकी छिन् । 'पलजीसँगको सम्बन्धलाई तोडमोड गरेर आएको समाचारले मेरो चरित्रहत्या भएको छ' उनी लेख्छिन्, 'एउटै नगरीमा रहेकाले उहाँले मलाई अभिभावकको हिसाबले माया गर्नु हुन्छ र दर्शकको माया पाएसम्म हाम्रो सहकार्य रहिरहने छ ।'

यस्तो छ समीक्षाद्वारा सार्वजनिक गरिएको भनाइ

मलाई समीक्षा अधिकारी बनाउनु हुने मेरा सम्पूर्ण दर्शक स्रोताज्यूहरुमा हार्दिक नमन गर्दछु। पछिल्लो समय मेरो बारेमा नायक पल शाहज्यूसँग जोडेर हुँदै नभएको कपोलकल्पित समाचारहरू आएका छन्, यसप्रति मेरो गम्भीर ध्यानाकर्षण भएको छ। समाचारमा मेरो र पलजीको सम्बन्धलाई तोडमोड गरेर तुच्छ प्रकारका कुराहरू मेडियामा आएका छन्, जसले मेरो चरित्रहत्या भएको छ। यसका साथसाथै पलजीको क्यारिअरमाथि आँच आउने किसिमले सस्तो प्रचार बाजी गरिराको छन्। यसो नगर्नु हुन अनुरोध गर्दछु। बिनास्रोत अफवाहमा लेखिएका यी समाचारले हामीलाई सामाजिक र चारित्रिक रूपमा निकै नै असर पुर्याएको छ, यस कुराप्रति म र मेरो परिवार खेद प्रकट गर्दछौ । एउटै इन्डस्ट्रिजमा भएको हिसाबले पलजीले मलाई अभिभावकको हिसाबले माया गर्नुहुन्छ । मेरो कला र क्षमतालाई माया संरक्षण गर्नुहुन्छ म उहाको सदैव फ्यान पनि हुँ। र, हजुरहरूको माया रहेसम्म सधैं राम्रो काम गरिरहने छौ। राष्ट्रको चौथो अंग मानिएको पत्रकारिताका अग्रज र दिग्गज अभिभावकहरूले पनि यसरी मानहानि र चरित्रहत्या हुने किसिमले लेखिएका समाचारले निकै दुःखी छु। मैले यो अपेक्षा गरेको थिएन ।
म जे छु जहाँ छु, यो सब मेरा भगवानरूपी दर्शक स्रोताको देन हो र हजुरहरूलाई कुनै पनि कुराले निराश गर्न सक्दिनँ र गर्ने छैन। मेरो बारेमा मिडियामा आएका झुटा समाचारहरूप्रति घोर निन्दा गर्दछु र हजुरहरू यसको पछाडि नलाग्नुहुन हार्दिक अनुरोध गर्दछु। अन्त्यमा सम्पूर्ण पत्रकारज्यूहरूलाई पनि हार्दिक निवेदन गर्न चाहन्छु, कसैको व्यक्त्तिगत जीवनमा आँच आउने मानहानि तथा चरित्रहीन हुने किसिमको समाचार नबनाउनु होला।

केही समययता पल र समीक्षाबीच प्रेमको चर्चा फिल्मनगरीमा छ । म्युजिक भिडियो छायाङ्कनको क्रममा पल र समीक्षा नजिकिएको र उनीहरूबीच सामीप्य बढ्दै गएर प्रेममा परिणत भएको चर्चाकारहरूको भनाइ छ । जे होस् अब पल र समीक्षा दुबैले आ-आफ्ना भनाइ सार्वजनिक गर्दै आफूहरूबीचको सम्बन्ध खालि पेशागत मात्रै भएकोले यसलाई अन्य नाम नदिन आग्रह गरिसकेपछि यसमा थप चर्चा आवश्यक रहेन । तर पनि फिल्मनगरीका जानिफकारहरूले एउटा प्रश्न भने गर्न छोडेका छैनन् - "हावा नचली पात हल्लिएको हो त ?"