नेपाली कविका कृति कोरियामा पुरस्कृत, २५ लाख वनसहित ‘एसिया भिजन’ पुरस्कार प्राप्त

कला-साहित्य

गृहपृष्ठ
कला-साहित्य

नेपाली कविका कृति कोरियामा पुरस्कृत, २५ लाख वनसहित ‘एसिया भिजन’ पुरस्कार प्राप्त

रासस आइतबार, कात्तिक ७, २०७८

दक्षिण कोरियामा नेपाली कविहरूको संयुक्त कविता कृति ‘यो मेशिनको शहर हो’ लाई २५ लाख कोरियन वनसहित कोरियाको एक प्रतिष्ठित पुरस्कार ‘एसिया भिजन’ प्राप्त भएको छ । कोरियाको प्रतिष्ठित साहित्य संस्था हेसान बाग्दुजिनद्वारा आज एक समारोहबीच उक्त पुरस्कार प्रदान गरिएको हो ।

कोरियाका लोकप्रिय कवि स्व. बाग्दुजिनको नाममा स्थापित उक्त संस्थाले प्रतिष्ठित बाग्दुजिन पुरस्कार र आन्सङ पुरस्कार प्रदान गर्दै आएकोमा यसपालिदेखि ‘एशिया भिजन पुरस्कार’ प्रदान गर्न सुरु गरेको हो । पहिलो पटक प्रदान गरिएको यो पुरस्कार चिनियाँ कवि जनउन्जी र नेपाली कविहरूको कृतिलाई संयुक्त रूपमा प्रदान गरिएको हो । ५० लाख कोरियन वन (नेपाली रुपैयाँ पाँच लाख बराबर) नगद राशिको उक्त पुरस्कार दुई कृतिलाई संयुक्त रूपमा प्रदान गरिएका कारण नेपाली कृतिले २५ लाख प्राप्त गरेको हो ।

सो पुस्तकका कविहरूको प्रतिनिधिको रूपमा अनुवादक तथा कवि मोहन कार्कीले पुरस्कार ग्रहण गरे । पुरस्कारको रकमले कोरियामा रहेका नेपाली कथाकारको कथालाई अनुवाद गरी कोरियन भाषामा प्रकाशन गर्ने योजना रहेको कार्कीले बताए ।कार्यक्रममा नेपाली पुस्तक ‘यो मेशिनको शहर हो’ को समीक्षा गर्दै एशिया फाउण्डेशनका अध्यक्ष जो नामछलले विदेशमा कामदारको रूपमा कार्यरत भए पनि नेपाली कविका कवितामा उच्च काव्यिक चेतना रहेको बताए ।

कोरियामा रोजगारीलगायत विविध पेसामा आबद्ध ३५ जना नेपाली कविका ७० कविता समावेश भएको कविता सङ्ग्रह ‘यो मेसिनको शहर हो’ गत पुसमा प्रकाशन भएको थियो । कृतिमा कवि सुरेशसिंह सम्बाहाङ्फे, सेसेफुङ सेर्मा, जीवन खत्री, बोनम प्रताप, सुष्मा रानाहँछा, शकुन आँशु, खोम गुरुङ, बाबु बलिन्द्र, सुन्दर गाउँले, निर्गराज राई, रमेश सायन, गनिन्द्र विवश, रामकुमार राई, मधु सिङ्जाली मगर, विङ्कल चेम्जोङ, सञ्जय काउछा, दीपा मेवाहाङ राई, यल्जी विवश, वियोगी काइँलालगायतका कविता समाविष्ट छन् ।

कविताको पराजित पोमुले सम्पादन गरेको कृतिलाई कोरियन कवि इ गिजु(मुना) र मोहन कार्कीले अनुवाद गरेका हुन् । नेपाली भाषामा लेखिएका कवितालाई कोरियन भाषामा अनुवाद गरी कोरियाको प्रतिष्ठित प्रकाशन गृह ‘नाम्छाङ’ ले गत पुसमा प्रकाशन गरेको थियो । कविता कृति ‘यो मेशिनको शहर हो’ नेपाली भाषामा पनि प्रकाशन गर्ने योजना रहेको प्रकाशकले बताएका छन् । यस कृतिलाई यसअघि पनि ‘रेड अर्वार्ड’ प्रदान गरिएको थियो । केही महिना अघि राजधानी सउलमा रुसी बोल्सेभिक क्रान्तिको स्मृतिका अवसरमा ‘रेड अवार्ड’ प्रदान गरिएको थियो ।

प्रकाशित मिति: आइतबार, कात्तिक ७, २०७८

प्रतिक्रिया दिनुहोस्