साञ्जेन जलविद्युत् आयोजनाको संरचना निर्माणको काम लगभग पूरा

समाचार

गृहपृष्ठ
समाचार

साञ्जेन जलविद्युत् आयोजनाको संरचना निर्माणको काम लगभग पूरा चिनियाँ प्राविधिक नआइदिंदा विद्युतगृह भित्रका उपकरण जडानमा विलम्ब

सोमबार, कात्तिक १, २०७८

रसुवाको चिलिमे क्षेत्रमा निर्माणाधीन तल्लो साञ्जेन जलविद्युत् आयोजानको अधिकांश भौतिक संरचना निर्माणको काम सकिएको छ । सन् २०१३ मा निर्माण सुरू भएको ४२.५ मेगावाट क्षमताको उक्त आयोजनाको ३ हजार ६३० मिटर हेडरेस् सुरुङ, १ हजार ५१ मिटर उचाइको सर्ज ट्याङ्क, ४७८ मिटर पेनस्टक सुरूङ तथा विद्युत्गृहसमेत निर्माण सम्पन्न भइसकेको छ । विद्युत्गृहमा पानी ल्याउने सुरूङको निर्माणपश्चात् कङ्क्रिट तथा पेनस्टक सुरूङमा पाइप राख्ने कामसमेत धमाधम अगाडि बढिरहेको आयोजनाले जनाएको छ ।

संरचना निर्माणको समग्र प्रगति ८४ प्रतिशत पूरा भए पनि विद्युत् गृहभित्र उपकरण जडानको काम भने हुन सकेको छैन । उपकरण जडानको प्रगति ५० प्रतिशत हासिल गर्नुपर्ने समय बितिसक्दा पनि कामको जिम्मा लिने कम्पनीका चिनियाँ प्राविधिक नआइदिंदा काममा विलम्ब भएको छ । चिनियाँ प्राविधिकले कोरोनाको समस्या देखाइ कार्यस्थलमा आउन आनाकानी गरिरहेको जनाइएको छ ।

छिटोभन्दा छिटो उपकरण जडान गरिदिन प्राविधिक समूहसँग संवाद भइरहेको आयोजना प्रमुख अर्पणबहादुर सिंहले बताएका छन् । विद्युत्गृहको उपकरण जडानको लागि कार्य प्रारम्भ भएको मितिले लगभग एक वर्ष लाग्ने भएकाले जडानकर्तालाई छिटो आइदिन ताकेता भइरहेको बताइन्छ । आयोजना प्रमुख सिंहका अनुसार उक्त विद्युत् आयोजना सम्पन्न गर्न प्रतिमेगावाट रु १२ करोड ६३ लाख खर्च हुने अनुमान छ ।

यस्तै १४.८ मेगावाटको माथिल्लो साञ्जेन जलविद्युत् आयोजनाले पनि निर्माण गर्नुपर्ने ९८ प्रतिशत संरचना तयार पारी उपकरण जडानका लागि चिनियाँ प्राविधिकको प्रतीक्षा गरिरहेको छ । चिनियाँ प्राविधिक नआएकै कारण सिम्बुगाउँमा निर्माण भएको माथिल्लो विद्युत्गृहमा समेत उपकरण जडान हुन नसकेको आयोजना प्रमुख सुदन महतले जानकारी दिए ।

तिलोचे बगरमा बाँधिएको बाँधबाट ल्याइएको चिलिमे खोलाको पानीले कूल ५७.३ मेगावाट विद्युत् उत्पादन हुने गरी सिम्बु र चिलिमे टारसमेत दुई स्थानमा छुट्टाछुट्टै विद्युत्गृह निर्माण भइसकेका छन् । पानीको स्रोत एउटै हुँदा सिम्बुमा रहने माथिल्लो विद्युत्गृह बन्द गर्नुपर्ने अवस्था आए पनि सोही पानीले तल्लो विद्युत्गृह भने निर्वाधरूपले सञ्चालन हुने जनाइएको छ ।

तल्लो साङ्जेन जलविद्युत् आयोजनाको निर्माण ढिलाइ हुनुमा विगतमा भएको पेट्रोलिम पर्दाथको अभाव, विसं २०७२ को विनाशकारी भूकम्प, कोभिड रोगको सङ्क्रमण तथा पटक पटक आयोजना प्रमुखको फेरबदलजस्ता कारण रहेको बताइएको छ ।

प्रकाशित मिति: सोमबार, कात्तिक १, २०७८