काठमाडौँ विश्वविद्यालयको उपकुलपतिमा अच्युत वाग्ले

शिक्षा/पुस्तक

गृहपृष्ठ
शिक्षा/पुस्तक

काठमाडौँ विश्वविद्यालयको उपकुलपतिमा अच्युत वाग्ले

समाचारदाता मंगलबार, चैत ५, २०८१

काठमाडौँ विश्वविद्यालयको उपकुलपति पदमा प्राडा अच्युतप्रसाद वाग्ले नियुक्त गरिएका छन् । विश्वविद्यालयको रिक्त उपकुलपति छनोटका लागि गठित खोज तथा सिफारिस समितिका संयोजक र सदस्यद्वयको सिफारिसमा परेका तीन जनामध्येबाट डा वाग्लेलाई प्रधानमन्त्री एवं कुलपति केपी शर्मा ओलीबाट सो विश्वविद्यालयको ऐन, २०४८ को दफा १३ (४) बमोजिम आज नियुक्त गरिएका हुन् । उपकुलपति छनोटका लागि डा सुरेशराज शर्मा, डा अर्जुन कार्की र जनार्दन नेपाल रहेको समिति गठन गरिएको थियो । सो विश्वविद्यालयका उपकुलपति डा भोला थापाको कार्यकाल गत माघ ६ गते सकिएको थियो ।

शर्माले भोला थापालाई दोहर्‌याउन चाहेकोमा अन्य दुई जनाले दिएको अङ्कबाट थापा ३ जनामा नपरेपछि थापाले ३ जनाको नाम बुझाउन ढिलाइ गरेका थिए । काभ्रेपलाञ्चोकको वनेपा नगरपालिकामा २०२५ सालमा जन्मिएका नवनियुक्त उपकुलपति वाग्ले काठमाडौँ विश्वविद्यालयका कार्यवाहक उपकुलपति एवं रजिष्ट्रार थिए । उनले सो विश्वविद्यालयको स्कुल अफ म्यानेजमेन्टको सहायक डीन, उक्त स्कुलको विज्ञान विभागको प्रमुख र एड्जङ्कट प्रोफेसर रहेर काम गरेका थिए ।

उनले इन्डियन इन्स्टिच्युट अफ टेक्नोलोजी, कानपुरबाट अर्थशास्त्रमा विद्यावारिधी गरेका छन् । उनी पत्रिकामा लेख लेख्ने लेखक पनि हुन् । उनले व्यवसाय, वातावरण, क्षेत्रीय अर्थतन्त्र, वित्तीय सङ्घीयता र उद्यमशीलता आदि लेख्छन् ।उनी ४ वर्षसम्म उपकुलपति रहने छन् ।

प्रकाशित मिति: मंगलबार, चैत ५, २०८१