सतर्कता केन्द्र बसेको मन्त्रालयमै भेटिए अनेकौँ बेथिति

समाचार

गृहपृष्ठ
समाचार

सतर्कता केन्द्र बसेको मन्त्रालयमै भेटिए अनेकौँ बेथिति चार मन्त्रालयमा अनुगमन गर्दा पोसाक नलगाउने, ढिलो आउने र भाग्ने कर्मचारी धेरै

समाचारदाता आइतबार, जेठ ६, २०८१

राष्ट्रिय सतर्कता केन्द्रले आफैँ बसेको भवनमा रहेको शिक्षा मन्त्रालयसहितका मन्त्रालयमा बेथिति भेटेको छ ।सिंहदरवारभित्रका विभिन्न चारवटा मन्त्रालयमा छड्के अनुगमन गर्दा बेथिति फेला परेको केन्द्रले जनाएको हो । चार मन्त्रालयहरूमा शिक्षा, विज्ञान तथा प्रविधि, गृह , उद्योग वाणिज्य तथा आपूर्ति र परराष्ट्र मन्त्रालयका कर्मचारीले समय पालना गरे/नगरेको, तोकिएका पोसाक लगाए/नलगाएको लगायत विषयमा अनुगमन गरेको थियो ।

सतर्कता केन्द्रका अनुसार अनुगमनका क्रममा शिक्षा मन्त्रालयमा सात र गृह मन्त्रालयमा नौ गरी १६ जना कर्मचारी अनुपस्थित रहेको तथ्याङ्क सङ्कलन गरेको छ । साथै तोकिएको कार्यालय समयभन्दा ढिला आउने कर्मचारीको सङ्ख्या ७४ जना भेटिएको थियो ।

शिक्षा मन्त्रालयका सात, गृह मन्त्रालयका ३४, उद्योग मन्त्रालयका दुई र परराष्ट्र मन्त्रालयका १० जना तोकिएको कार्यालय समयभन्दा ढिला कार्यालय आएको भेटिएको छ । अनुगमनका क्रममा शिक्षा मन्त्रालयका चारजना कर्मचारी आफ्नो कार्यकक्षमा नभेटिएको पनि सतर्कता केन्द्रले जनाएको छ । ती मन्त्रालयहरुमा तोकिएको पोसाक नलगाउने कर्मचारीको सङ्ख्या पनि उल्लेख्य देखिएको छ ।

शिक्षा मन्त्रालयका नौ, उद्योग मन्त्रालयका दुई र परराष्ट्र मन्त्रालयका नौ गरी २० जना कर्मचारी तोकिएको पोसाक नलगाईकन कार्यालयमा उपस्थित भएको सतर्कता केन्द्रले जनाएको छ । अनुगमनका क्रममा शिक्षा मन्त्रालयमा सेवाग्राही सहायता कक्ष नरहेको, अपाङ्गमैत्री कार्यस्थल नरहेको, प्रतीक्षालय नरहेको, चमेनागृहको सरसफाइ राम्रो नदेखिएकोलगायत कैफियत सतर्कता केन्द्रले औँल्याएको छ ।

राष्ट्रिय सतर्कता केन्द्र शिक्षा मन्त्रालयको भूइँ तलाको पूर्वपट्टि रहेको छ ।

प्रकाशित मिति: आइतबार, जेठ ६, २०८१