युवा उमेरमै मस्तिष्काघात हुनु चिन्ताजनक: उपराष्ट्रपति यादव

स्वास्थ्य

गृहपृष्ठ
स्वास्थ्य

न्युरोलोजिष्टहरूको अन्तर्राष्ट्रिय सम्मेलन युवा उमेरमै मस्तिष्काघात हुनु चिन्ताजनक: उपराष्ट्रपति यादव

समाचारदाता आइतबार, जेठ ६, २०८१

उपराष्ट्रपति रामसहाय प्रसाद यादवले मस्तिष्काघात सामान्यतया ५५ वर्ष उमेरभन्दा माथिकालाई हुने भए पनि नेपालमा यो समस्या युवा उमेरमै देखिनु चिन्ताको विषय भएको बताएका छन् ।

‘नेप्लिज एकेडेमी अफ न्यूरोलोजी’ को प्रथम अन्तरर्राष्ट्रिय सम्मेलनलाई काठमाडौंमा सम्बोधन गर्दै उनले उक्त चिन्ता व्यक्त गरेका हुन् । ‘हाम्रो देशमा ४५ वर्ष मुनिका धेरै युवा मस्तिष्कघातबाट पीडित हुनु चिन्ताको विषय हो ’ उनले भने, ‘यो डरलाग्दो अवस्थालाई न्यूनीकरण गर्न अति आवश्यक छ।’

उपराष्ट्रपति यादवले रोगहरु बढ्नुको मुख्य कारण मानिसको अव्यवस्थित जीवनशैली भएको बताए । ‘आरामदायी जीवनशैली, धुम्रपान, मदिरा सेवन, उच्च रक्तचाप, मधुमेह र कोलेस्ट्रोलका कारण धेरैको अकालमै मृत्यु हुने गरेको छ । हामीले हाम्रो दैनिकी र जीवनशैलीमा सुधार गर्न जरुरी छ’ उनले भने, ‘नियमित व्यायाम, स्वस्थकर खानपान, आवधिक स्वास्थ्य परीक्षण र चिकित्सकीय परामर्शबाट धेरै रोगलाई नियन्त्रण गर्न सकिन्छ ।’

उनले न्यूरोसंग सम्बन्धित रोगको निदान र उपचारमा जोड दिँदै शरीरका विभिन्न अंगमा रोगको दीर्घकालीन असरलाई कम गर्न सक्नु पर्ने बताए । उनले नेपालमा सहरी क्षेत्रमा स्वास्थ्य क्षेत्रको अवस्था केही सामान्य भए पनि दुर्गम गाउँवस्तीमा बसोबास गर्ने आम नागरिकलाई समयमै उपचार पाउन अझै गाह्रो रहेको चर्चा गरे ।

‘अझ जटिल र घातक रोगको उपचारका लागि विदेश जानुपर्ने बाध्यता छ । यो बाध्यता हटाउँदै अन्तर्राष्ट्रिय स्तरको सेवा स्वदेशमै उपलब्ध गराउन सक्नु पर्दछ ’ उनले भने, ‘न्यूरोसंग सम्बन्धित रोगको रोकथाम, नियन्त्रण र उपचारको भरपर्दो व्यवस्था गरी सबै नेपालीको जीवन रक्षाका लागि सरकारसँगै यस क्षेत्रमा क्रियाशील संघसंस्था पनि प्रतिबद्ध हुन जरुरी छ’ ।

उनले ‘नेप्लिज एकेडेमी अफ न्यूरोलोजी’ले न्यूरोलोजीसँग सम्बन्धित रोगहरूको नियन्त्रणमा महत्वपूर्ण भूमिका खेल्न सक्ने उल्लेख गर्दै न्यूरोलोजीको क्षेत्रमा देखिएका समस्याहरू पहिचान गर्न र त्यसको समाधानका लागि सम्मेलन सफल हुने विश्वास व्यक्त गरे ।

कार्यक्रममा उपराष्ट्रपति यादवले प्राडा. दिनेश विक्रम शाह, प्राडा. रविन्द्र श्रेष्ठ र डा. बिरेन्द्र कुमार विष्टलाई संस्थाका तर्फबाट सम्मानपत्र प्रदान गरे । कार्यक्रम संस्थाका अध्यक्ष डा.कृष्णकुमार ओलीको सभापतित्वमा सम्पन्न भएको थियो । डा. ओलीले कार्यक्रममा न्युरोलोजीमा देखिएका समस्या र तिनीहरुको निराकरणबारे आफ्नो महत्वपूर्ण विचार तथा अनुभव प्रस्तुत गर्ने डाक्टरहरुलाई सम्मान तथा मायाको चिनो प्रदान गरे ।

डा. ओलीले न्युरोलोजीको वर्तमान अवस्था र यसको निराकरणबारे पनि प्रकाश पारेका थिए । कार्यक्रममा डा. अरुण सायमी, प्राडा. दिनेश विक्रम शाह, प्राडा. रविन्द्र श्रेष्ठ र डा. बिरेन्द्र कुमार विष्टलगायतले मन्तव्य व्यक्त गरेका थिए । शनिबार बिहान ९ बजे वैदिक वटुकहरुद्वारा वेदका मन्त्र उच्चारण गर्दै शान्तिको कामनासहित उद्घाटन गरिएको २ दिने कार्यक्रमलाई उपराष्ट्रपति यादवले साँझ सम्बवधन गरेका हुन् ।

प्रकाशित मिति: आइतबार, जेठ ६, २०८१

प्रतिक्रिया दिनुहोस्