दोषीलाई कार्बाही गर्ने ६ बुँदे सहमति, चिकित्सक हडताल फिर्ता

स्वास्थ्य

गृहपृष्ठ
स्वास्थ्य

दोषीलाई कार्बाही गर्ने ६ बुँदे सहमति, चिकित्सक हडताल फिर्ता

समाचारदाता आइतबार, भदौ ३१, २०८०

हेटौंडाको सञ्चो अस्पतालमा डाक्टर कुटिएपछि हडतालमा उत्रिएको नेपाल चिकित्सक सङ्घले हडतालको कार्यक्रम फिर्ता लिएको छ । सरकारसँग छ बुँदे सहमति भएपछि आज साँझ संघले हडताल फिर्ता गरेको हो । स्वास्थ्य मन्त्रालयमा भएको वार्तामा छ बुँदे सहमति गर्दै चिकित्सकबाट गरिएका हडतालका कार्यक्रम फिर्ता गरिएका छन् ।

सरकारी वार्ताटोलीका संयोजक एवं मन्त्रालयका अतिरिक्त सचिव डा विकास देवकोटा र चिकित्सक सङ्घका अध्यक्ष डा अनिलविक्रम कार्कीले सहमतिपत्रमा हस्ताक्षर गरेका छन् । भदौ २७ गते सञ्चो अस्पतालमा चिकित्सकद्वय डा विकास थापा र डा प्रशान्त बिडारीमाथि आक्रमण गरेका दोषीहरूलाई तत्काल पक्राउ गर्ने र पक्राउ परेका चारजना, पक्राउ पुर्जी जारी भएका पाँचजनासहित दोषीहरूलाई स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ (पहिलो संशोधन ऐन, २०७९) अनुसार कारबाही गरिने भएको छ ।

यस्तै स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ (पहिलो संशोधन ऐन, २०७९) को प्रभावकारी कार्यान्वयन गर्न सरकारका सरोकारवाला निकायहरू प्रतिबद्ध रहने, सोही ऐन (पहिलो संशोधन ऐन, २०७९) को दफा ५ बमोजिमको स्वास्थ्यकर्मी तथा स्वास्थ्य संस्था सुरक्षा समन्वय समितिलाई स्वास्थ्य मन्त्रालयले सक्रिय बनाउन मासिकरूपमा बैठक बस्ने व्यवस्था गर्ने सहमति भएको छ । यसैगरी ऐनको कार्यान्वयनका लागि सरोकारवालालाई स्वास्थ्य क्षेत्रको संवेदनशीलतालाई मनन गरी सोहीअनुरूप सचेतनामूलक कार्यक्रम मन्त्रालय र सङ्घले यसै आर्थिक वर्षदेखि सुरु गर्ने, चिकित्सकको सेवा सुविधा, सुरक्षा, जनशक्ति परिचालन, क्षमता अभिवृद्धि तथा विदेशिने प्रवृत्ति कम गर्नेलगायतका समस्या समाधान गर्ने गरी तीन महिनाभित्र चिकित्सक सेवासम्बन्धी विधेयकको मस्यौदा तयार गर्न आवश्यक प्रक्रिया अगाडि बढाउने पनि सहमति भएको छ । सरकारी वार्ता समितिमा गृहमन्त्रालयका सहसचिव केदारनाथ शर्मा, कानून न्याय तथा संसदीय मामिला मन्त्रालयका सहसचिव निर्मला अधिकारी, प्रधानमन्त्री तथा मन्त्रिपरिषद् कार्यालयका सहसचिव सङ्गीता ओझा र स्वास्थ्य मन्त्रालयका सहसचिव रमेशकुमार केसी रहनुभएको थियो । आन्दोलनरत चिकित्सक सङ्घबाट अध्यक्ष डा कार्कीसहित उपाध्यक्षद्वय डा नन्दा गुरुङ, डा प्रकाश बुढाथोकी, डा प्रशान्त भट्ट र महासचिव डा सञ्जीव तिवारी रहनुभएको थियो ।

चिकित्सकमाथि आक्रमण गर्नेलाई कारबाही माग गर्दै आज देशभरिका स्वास्थ्य संस्था आकस्मिक सेवा बाहेकका सबै सेवा सङ्घले बन्द गराइएका थिए ।

प्रकाशित मिति: आइतबार, भदौ ३१, २०८०

प्रतिक्रिया दिनुहोस्