कोशीमा लम्पी स्किन सङ्क्रमित पशुसंख्या सवा दुई लाख नाघ्यो, खोप सवा लाखलाई पनि पुगेन

प्रशासन

गृहपृष्ठ
प्रशासन

कोशीमा लम्पी स्किन सङ्क्रमित पशुसंख्या सवा दुई लाख नाघ्यो, खोप सवा लाखलाई पनि पुगेन सात प्रदेशमध्ये कोशीमा यो महामारी तीव्र छ, ठूला चौपाया मर्ने क्रम जारी छ

समाचारदाता शनिबार, साउन ६, २०८०

गाईभैँसीको महामारी रोग ‘लम्पी स्किन’बाट कोशी प्रदेशमा दुई लाख २५ हजार चार सय २३ गाईभैँसी सङ्क्रमित भएको पशुपन्छी तथा मत्स्य विकास निर्देशनालय विराटनगरले जनाएको छ । राँगाभैँसीभन्दा गाईगोरुमा रोग महामारी अत्यधिक छ । लम्पी स्किनबाट हालसम्म पाँच हजार ४२ गाईभैँसी मरिसकेको निर्देशनालयका फोकल पर्सन डा देवकुमार दर्लामीले जानकारी दिए । उनका अनुसार लम्पी स्किनको सङ्क्रमण कोशीका सबै जिल्लामा फैलिएको छ भने इलाम, झापा, मोरङ, पाँचथर, सुनसरी र उदयपुरमा सबैभन्दा बढी क्षति भएको छ ।

मरेकामध्ये सबैभन्दा बढी इलाममा एक हजार ३८२ गाईगोरु र राँगाभैँसी मरेको निर्देशनालयले जनाएको छ । झापामा पाँच सय चार, पाँचथरमा चार सय २२, मोरङमा चार सय ८८, उदयपुरमा तीन सय ८५, सुनसरीमा तीन सय ६२, खोटाङमा दुई सय ७९, धनकुटामा दुई सय ७७, सङ्खुवासभामा दुई सय ८५, ओखलढुङ्गामा दुई सय दुई, तेह्रथुममा एक सय ४४, ताप्लेजुङमा एक सय ७०, भोजपुरमा ८३ र सोलुखुम्बुमा ३५ गाईगोरु र राँगाभैँसी लम्पी स्किनको सङ्क्रमणबाट मरिसकेका छन् । मृत्युदर इलाममा धेरै भए तापनि प्रभावित पशु पाँचथरमा धेरै छन् ।

लम्पी स्किनको औषधि छैन । यो लाग्न नदिन पहिल्यै खोप लगाउनु पर्छ । तर खोप लगाएका पशुको संख्या कोशिमा सवा लाख पनि पुगेको छैन । लम्पी स्किन रोगको सङ्क्रमण रोक्न कोशी प्रदेश सरकारले ११ जिल्लामा पशुमा खोप लगाउने अभियान सञ्चालन गरिरहेको छ । पशु स्वास्थ्य प्राविधिकले गोठमै पुगेर पशुमा खोप लगाइरहेको निर्देशनालयले जनाएको छ ।

निर्देशनालयका निमित्त प्रमुख डा पशुपति ढुङ्गानाका अनुसार कोशी प्रदेशका सबै जिल्लाका एक लाख सात हजार पाँच सय १० पशुलाई लम्पी स्किनविरुद्धको खोप लगाइएको छ । सबैभन्दा बढी झापामा ३० हजार चार सय ५६ वटा पशुमा लम्पीविरुद्धको खोप लगाइएको छ । इलाममा २७ हजार ५४, पाँचथरमा १४ हजार तीन सय, ताप्लेजुङमा नौ हजार एक सय, मोरङमा पाँच हजार सात सय ८२, उदयपुरमा एक हजार छ सय ८६, खोटाङमा चार हजार एक सय ९२, ओखलढुङ्गामा चार हजार छ सय ७५, सोलुखुम्बुमा दुई हजार छ सय, धनकुटामा दुई हजार दुई सय र सुनसरीमा पाँच हजार चार सय ७५ पशुमा खोप लगाउने कार्य सम्पन्न भइसकेको उनले जानकारी दिए ।। पहाडी जिल्ला धनकुटा, सङ्खुवासभा र भोजपुरमा लम्पीविरुद्धको खोप लगाउन पशुस्वास्थ्यकर्मी पुगेका पनि छैनन् ।

प्रकाशित मिति: शनिबार, साउन ६, २०८०

प्रतिक्रिया दिनुहोस्