१० हिमाली जिल्लामा १८ वर्षमाथिका सबैलाई खोप दिने अभियान सुरु

मुख्य समाचार

गृहपृष्ठ
मुख्य समाचार

१० हिमाली जिल्लामा १८ वर्षमाथिका सबैलाई खोप दिने अभियान सुरु

सोमबार, असोज ४, २०७८

१० वटा हिमाली जिल्लामा १८ वर्षमाथिकालाई आजदेखि कोरोना भाइरस विरुद्धको खोप अभियान सञ्चालन गरिएको छ । स्वास्थ्य तथा जनसङ्ख्या मन्त्रालयका अनुसार ती जिल्लाका १८ वर्षभन्दा माथिका सबैलाई आजदेखि यही असोज १४ गतेसम्म कोरोना भाइरस विरुद्धको पहिलो मात्रा खोप दिन लागिएको हो । ताप्लेजुङ, सङ्खुवासभा, सोलुखुम्बु, रसुवा, जुम्ला, मुगु, हुम्ला, डोल्पा, बाजुरा र दार्चुलामा आजदेखि अभियान थालिएको मन्त्रालयका सहप्रवक्ता डा. समिरकुमार अधिकारीले जानकारी दिए ।

सहप्रवक्ता डा. अधिकारीका अनुसार खोप लगाउन छुटेका १८ वर्षभन्दा माथि उमेरका विद्यार्थी सबैलाई खोप लगाइने छ ।

काभ्रे र चितवनमा ३५ वर्षमाथिकालाई खोप लगाउन थालिएको छ । यसैगरी काठमाडौं, ललितपुर, भक्तपुर, मकवानपुर, रामेछाप, सर्लाही र अछाम जिल्लामा ४० वर्ष माथिका खोप लगाउन बाँकी सबैलाई खोप लगाइने छ ।

यस्तै, मनाङ्, मुस्ताङ र पूर्वीरुकुम वाहेकका ५५ जिल्लामा ४५ वर्षमाथिका खोप लगाउन बाँकी सवै नागरिकलाई अभियानकै रूपमा खोप लगाइने उनले बताए ।

अहिले पहिलो मात्रा खोप लिनेहरूका लागि कात्तिक ४ देखि कात्तिक १४ गतेसम्म भेरोसेलको दोस्रो मात्राको खोप प्रदान गरिने छ । काठमाडौं जिल्लामा यसअघि भेरोसेलको पहिलोमात्रा खोप लगाएर बसेकाहरूलाई आजदेखि दोस्रो मात्रा दिन थालिएको छ । यसको लागि असोज ६ गतेसम्मको मिति तोकिएको छ ।

मन्त्रालयले खोप लगाउनका लागि आफ्नो परिचय खुल्ने परिचयपत्र लिएर जान समेत अनुरोध गरेको छ । अहिलेसम्म नेपालमा पहिलो मात्रा ६२ लाख ३ हजार ३१६ जनाले र पूर्णमात्रा ५५ लाख ७८ हजार ८६५ जनाले लगाइसकेका छन् ।

प्रकाशित मिति: सोमबार, असोज ४, २०७८