पश्चिम सेती परियोजना अध्ययन गर्न उच्चस्तरीय सरकारी टोली डोटीमा

मुख्य समाचार

गृहपृष्ठ
मुख्य समाचार

पश्चिम सेती परियोजना अध्ययन गर्न उच्चस्तरीय सरकारी टोली डोटीमा

शनिबार, असोज २, २०७८

डोटीको तलारा तथा बैतडीको ढुङ्गाड क्षेत्रमा निर्माण हुने भनिएको ७५० मेगावाट क्षमताको पश्चिम सेती परियोजना निर्माण अध्ययन गर्न सरकारी टोली डोटी पुगेको छ । टोलीले पश्चिम सेती परियोजनाको विद्युतगृह निर्माण गरिने शिखर नगरपालिका तल्कोट क्षेत्रको अनुगमन गरेको दिपायल सिलगढी नगरपालिकाकी प्रमुख मञ्जु मलासीले बताइन् । उनले भनिन्, “पश्चिम सेती परियोजना निर्माण अध्ययन गर्न तीन सदस्यीय टोली आएको छ, टोलीले विद्युतगृह बन्ने ठाउँको अवलोकन गरेको छ, अब बाँधस्थलको अवलोकन गर्ने छ ।”

टोलीमा राष्ट्रिय योजना आयोगका उपाध्यक्ष डा. विश्व पौडेल, लगानी बोर्डका प्रमुख कार्यकारी अधिकृत सुशील भट्ट, ऊर्जा सचिव देवेन्द्र कार्कीसहित प्राविधिकहरू संलग्न छन् । टोलीले बाँधस्थल तराला र ढुङ्गाड क्षेत्रमा पुगेर अनुगमन तथा अध्ययन गर्ने बताइएको छ ।

सुदूरपश्चिम प्रदेशकै गौरवको आयोजना मानिएको पश्चिम सेती परियोजनाको निर्माण अझै सुरु हुनसकेको छैन । चर्चामा आएको लामो समय हुँदा पनि पश्चिम सेती निर्माणको काम अघि नबढेकोमा स्थानीयको गुनासो बढ्दै गएको छ । दिपायल सिलगढी नगरपालिका–१ का विजय खड्का भन्छन्, “अध्यन गर्ने थलो मात्रै हुँदैछ पश्चिम सेती, निर्माण कहिले हुन्छ ठेगान छैन, फेरि अध्यन टोली आएको छ हेरौँ, केके हुन्छ ।”

विगत ४० वर्षदेखि चर्चामै सीमित रहेको भन्दै अब यो आयोजना निर्माण हुन्छ भन्ने पत्यार लाग्नै छोडिसकेको प्रतिक्रिया शिखर नगरपालिका–११ बानीडुग्रीसैनका प्रेमबहादुर बलायरले दिए ।

सन् १९८१ देखि सो परियोजनाबारे चर्चा भएको हो । त्यतिबेला फ्रान्सेली संस्था सोग्रेहको र १९९४ मा नेपाल सरकारको विद्युत् विकास केन्द्र र अष्ट्रेलियन बहुराष्ट्रिय कम्पनी स्मेकबीच समझदारीपत्रमा हस्ताक्षर भएको थियो । सन् १९९७ मा नेपाल सरकार र वेस्ट सेती हाइड्रोबीच ७५० मेगावाट आयोजना निर्माण गर्ने सम्झौतामा हस्ताक्षर भएको थियो ।

परियोजना लागू हुने स्थान तथा बाँध बाँधिने ठाउँमा भवन निर्माणदेखि अन्य केही काम भएको पनि हो । तर परियोजनास्थलको पटक–पटक भौगर्भिक अध्ययन भए पनि सार्थकरूपमा काम भने हुन सकेको छैन । (रासस)

प्रकाशित मिति: शनिबार, असोज २, २०७८