बाबुआमाको सम्बन्ध बिग्रिँदा छोरीलाई भारत लगेर बलि चढाउने ठाउँमा पुर्‌याइयो

समाचार

गृहपृष्ठ
समाचार

मानव बेचबिखन भयावह बाबुआमाको सम्बन्ध बिग्रिँदा छोरीलाई भारत लगेर बलि चढाउने ठाउँमा पुर्‌याइयो माघ २२ गते पूर्णिमाको दिन बालिकालाई बलि चढाइँदै थियो, प्रहरी अनुसन्धानले बँचायो

समाचारदाता शुक्रबार, माघ २०, २०७९

बलि चढाउन लागिएकी बालिका उद्धारबारे पत्रकार सम्मेलनमा बोल्दै प्रहरी वरिष्ठ उपरीक्षक श्रेष्ठ

बाबुआमाबीचको सम्बन्ध बिग्रिँदा त्यसको मार बालबालिकामा पर्ने र तिनको दुरुपयोग तथा हत्या समेत हुन सक्ने जोखिम बढेको तथ्य बढ्दै गएका छन् । बलि दिन भारत पुर्‍याइएकी १६ वर्षे नेपाली बालिकाको उद्धारपछि नेपाल प्रहरीले सार्वजनिक गरेको विवरणबाट पारिवारिक बेमेल र सम्बन्धको खटपटले मानव तस्करहरूलाई सजिलो भएको घटना खुल्न आएको हो ।

माघ २२ गते पूर्णिमाको दिन बालिकालाई बलि चढाइँदै थियो । प्रहरीको मानव बेचबिखन अनुसन्धान ब्युरो भारतको दिल्लीस्थित मङ्गलबजार गल्लीबाट उद्धार गरिएकी बालिकालाई बलिको लागि तयारी अवस्थामा पुर‍्याउनुको कारणको जरो उनका बाबुआमाबीचको बेमेल थियो । उनीहरुको बमेलकै कारण उनी मामाघरमा बस्दै आएकी थिइन् । मामाघरबाटै उनलाई फकाएर काठमाडौं ल्याइएको थियो । बाबुआमाको झगडाले मानसिक असर परिरहेको र आफ्नो घर छोडेर मामाघरमा उदास बनेर बस्नु परेको अवस्थामा तस्करहरूले पैसा कमाएर धनी बन्न सकिने भन्दै उनलाई बन्धक बनाउन सफल भएको देखिएको छ । बालिकाको अवस्था थाहा पाएका नजिककी साथी र महिला मिलेर उनलाई फकाएर काठमाडौं ल्याएका थिए । बलि दिनको लागि बालिका खोज्दै हिँड्ने गिरोहले सोही किसिमले उदास बनेका वा बरालिएकाहरू खोज्ने गरेको पाइएको छ ।

ब्यूरोले पत्रकार सम्मेलन गरी बालिकाको उद्धारबारे जानकारी दिएको हो । “बालिकालाई तान्त्रिक बाबासँग भेटाइ तान्त्रिक बाबा खुसी भएमा अथाहा पैसा पाउने भनिएको रहेछ । भारत लानुअघि बालिकाको तौल, उचाई, शरीरमा दाग, टाटु र रजस्वला भए/नभएको परीक्षण गरिएको रहेछ”, ब्युरो निर्देशक प्रहरी वरिष्ठ उपरीक्षक जीवनकुमार श्रेष्ठले भने । उनका अनुसार बालिकालाई भारत लानुअघि र लगेपछि दुई पटक शारीरिक परीक्षण गरिएको थियो । साठी केजी तौल भएको, कम्तीमा उचाइ पाँच फिट चार इञ्चभन्दा माथि भएको, शरीरमा कुनै प्रकारको दाग वा टाटु, कुनै अङ्गमा चोटपटक नभएको र रजस्वला नभएको बालिकाको खोजी हुने क्रममा उक्त बालिकालाई भेटाइएको अभियुक्तहरुले जानकारी दिएको प्रहरीको भनाइ छ । अभियुक्तहरु छ जना छन् जो अहिले हिरासतमा लिइएका छन् ।

उनले थप जानकारी दिँदै भने- “प्रारम्भिक अनुसन्धानअनुसार अभियुक्तले बालिकालाई मुख्य तान्त्रिक बाबासँग केही दिनमा भेटाउने योजना बनाएको पाइएको छ । उनीहरुको आगामी पूर्णिमामा बालिकाको बलि चढाउने योजना रहेछ ।” निर्देशक श्रेष्ठले बालिका भने यसबारे जानकार नभएको बताए । उनले भने, “हामी दुई महिनादेखि बालिकाको खोजी अनुसन्धानमा जुटेका थियौं । दुई दिनअघि पाएको सूचनाका आधारमा बालिकाको उद्धार गरिएको हो ।” पीडित बालिका मङ्सिर १७ गते मामाघरबाट काठमाडौँ ल्याइएको थियो ।

पुस १९ सम्म काठमाडौँमा उनलाई बन्धक बनाइएको थियो । पुस २० गते बालिकालाई नेपाल–भारत सीमा सुनौली हुँदै दुई दिनमा भारतको दिल्लीस्थित पाहाडगञ्जमा पुर्‌याइएको प्रहरीको भनाइ छ । भारत पु¥याएपछि भारतका विभिन्न तीन स्थानमा रहेका तान्त्रिक बाबासमक्ष विभिन्न मितिमा निज बालिकालाई लगिएको थियो । प्रहरीको तथ्याङ्कअनुसार नेपालका विभिन्न नाकाबाट बेचबिखन र ओसारपसार हुनबाट माघ महिनामा मात्र १८ जना महिलालाई विभिन्न देशबाट उद्धार गरिएको छ । पछिल्ला पाँच वर्षमा ३० जना बालिकालाई बेचबिखन तथा ओसारपसार हुनबाट उद्धार गरिएको प्रहरीको भनाइ छ । बेचबिखन तथा ओसारपसार हुनबाट बालिका, महिला, बालक र पुरुष गरी चार सय ४३ जनाको उद्धार गरिएको छ ।

प्रकाशित मिति: शुक्रबार, माघ २०, २०७९