भारतको निजी क्षेत्रको कार्गाे रेल आइपुग्यो वीरगञ्ज, रहेन ढुवानीमा सरकारी एकाधिकार

मुख्य समाचार

गृहपृष्ठ
मुख्य समाचार

भारतको निजी क्षेत्रको कार्गाे रेल आइपुग्यो वीरगञ्ज, रहेन ढुवानीमा सरकारी एकाधिकार

बुधबार, भदौ ३०, २०७८

भारतबाट निजी क्षेत्रको कार्गो रेल पहिलो पटक बुधबार नेपाल आइपुगेको छ । नेपाल-भारत रेल सेवा सम्झौता भएको १७ वर्षपछि पहिलोपटक भारतीय निजी क्षेत्रको रेल आज बिहान वीरगञ्ज आइपुगेको हो ।

हिन्द टर्मिनल प्रालिको एक र्‍याकको कार्गो रेल बुधबार बिहान १० बजे वीरगञ्जस्थित सुख्खा बन्दरगाहमा आइपुगेको नेपाल इन्टरमोडल यातायात विकास समितिले जनाएको छ । हल्दियाबाट खाद्यान्नका २० फिट अग्ला ९० वटा कन्टेनर बोकेको रेल वीरगञ्जस्थित सुख्खा बन्दरगाह आइपुगेको समितिका कार्यकारी निर्देशक आशिष गजुरेलले जानकारी दिए ।

उनका अनुसार हिन्द टर्मिनल प्रालिले सातामा दुई दिन कार्गाे ढुवानी गर्ने जनाएको छ । साठ्ठै अन्य चार वटा निजी कम्पनीले समेत कार्गाे ढुवानीमा इच्छा देखाएका छन् । निजी क्षेत्रका कार्गाे रेललाई ढुवानी खुला गरेसगैँ अन्य कम्पनी पनि आउने विश्वास उनको छ ।

रेल सेवा सम्झौता संशोधनपछि निजी कार्गाेको प्रवेश

नेपाल र भारतबीच सन् २००४ मा भएको रेल सेवा सम्झौताले रेलमार्फत हुने ढुवानीमा भारतीय रेल्वेको भगिनी संस्थाको रुपमा रहेको कन्टेनर निगम (कोन्कर) लाई एकाधिकार दिएको थियो । १७ वर्षपछि भारतीय कन्टेनरको एकाधिकार तोड्दै गत असार २५ गते सम्झौता संशोधन गरिएको थियो । सम्झौतामा गरिएको संशोधनको करिब दुई महिना पश्चात् पहिलो पटक निजी कार्गाे रेल वीरगन्जस्थित सुख्खा बन्दरगाहामा आएको हो ।

गत असार २५ गते रेल सेवा सम्झौता संशोधन गर्दा नेपालका तर्फबाट वाणिज्य तथा आपूर्ति सचिव दिनेश भट्टराई र भारतका तर्फबाट भारतीय रेल मन्त्रालयअन्तर्गतको परिचालन एवं व्यवसाय विकास विभागका सदस्य सञ्जयकुमार मोहान्तीको नेतृत्वमा भर्चुअल समारोहमा कूटनीतिक पत्र तथा दुवै पक्षले हस्ताक्षर गरेको लेटर अफ एक्सचेन्ज आदानप्रदान गरिएको थियो ।

संशोधित सम्झौतामा नेपाल लक्षित पारवहन कार्गो ढुवानीका लागि नेपाल रेल्वे कम्पनीको स्वामित्वमा रहने रेल तथा वागनले पनि वीरगञ्ज र विराटनगरदेखि कोलकाता हल्दियासम्म रेल सेवा दिनसक्ने व्यवस्था गरिएको छ । यस्तै, नेपालको वीरगञ्जसम्म रेल सेवा उपलब्ध भएकोमा विराटनगर, भैरहवा र इनरवामा आवश्यक पूर्वाधार तयार भएपछि ती ठाउँमा पनि रेल सेवा विस्तार गर्दै जाने समेत सहमति गरिएको छ ।

प्रकाशित मिति: बुधबार, भदौ ३०, २०७८

प्रतिक्रिया दिनुहोस्